АННА НИКОЛАЕВНА СОЛОВЬЕВАҔА «ҮЙЭ СААС» БЭЛИЭТЭ ТУТТАРЫЛЫННА
АННА НИКОЛАЕВНА СОЛОВЬЕВАҔА «ҮЙЭ СААС» БЭЛИЭТЭ ТУТТАРЫЛЫННА 🔖Бүгүн Таатта улууһун ытык олохтооҕор, Неустроевтар учуутал династияларын саҕалааччы, үлэ, тыыл бэтэрээнигэр, Таатта улууһун бочуоттаах олохтооҕор, үйэлээх сааһыгар үктэммит Анна Николаевна Соловьеваҕа Саха Республикатын Ил Дархана Айсен Николаев аатыттан «Үйэ саас» анал бэлиэтин туттардылар. Улуус баһылыгын бастакы солбуйааччы Руслан Игнатьевич Захаров, улуустааҕы ветераннар сэбиэттэрин бэрэссэдээтэлэ Маргарита Арисовна Попова, дьахталлар сэбиэттэрин бэрэссэдээтэлэ Варвара Ильинична Будикина буолан ытык кырдьаҕаска дьиэтигэр тиийэн эҕэрдэлээтилэр, эҕэрдэ суруктары, тыыннаах сибэкки дьөрбөтүн туттардылар. Кыыһа Зинаида Петровна Охлопкова, сиэннэрэ Ульяна, Карина бэлэмнээбит минньигэс астаах остуол тула олорон Анна Николаевналыын сэһэргэһэн, ытык сааһыгар үктэммит ветеран учуутал долгутуулаах күнүн үөрүүтүн үллэһиннилэр. Үөрүүлээх күҥҥэ хос сиэнэ А.И.Софронов – Алампа аатынан Ытык Күөл 1№-дээх орто оскуолатын 4-с кылааһын туйгун үөрэнээччитэ Карина Постникова, учуутала Марина Егоровна Софронова уһуйан үөрэппит “Татыйык” ырыатын, эбээтэ Зинаида Петровна хомуска доҕуһуоллаан толорбутун, ытык кырдьаҕас долгуйа, сэмээр үөрэ, киэн тутта иһиттэ. Анна Николаевна ытык сааһыгар тиийэн олорон оҕо сааһын, эдэр сааһын, төрөөбүт улууһун Үөһэ Дьааҥы Эҥэ нэһилиэгин истиҥник ахтан-санаан, оскуолаҕа үлэлээбит кэмнэрин, үөрэппит оҕолорун туһунан чуо-бааччы кэпсээн, алтыспыт дьонун-сэргэтин ааттарын толору өйдүүрэ, олоҕун кэрдиис кэмнэрин субу баардыы кэпсиирэ сөхтөрдө. Ытык кырдьаҕас билигин да күннэтэ хаһыат ааҕан, тэлэбиисэринэн сахалыы биэриилэри көрөн, сиэннэрин кытта кэпсэтэн-ипсэтэн күнүн туһалаахтык атаарар эбит. “Элбэх оҕолооҕум – дьолум”, - диэн үйэлээх сааһыгар үктэммит Анна Николаевна санаатын үллэстэр. @taattagazeta @ulusmedia