Ытыктабыллаах улууспут бэчээтин уонна сонуннары киэҥник тарҕатар эйгэтин бары үлэһиттэр... — 1 июля 2026 г. в 00:40:38.373
Ытыктабыллаах улууспут бэчээтин уонна сонуннары киэҥник тарҕатар эйгэтин бары үлэһиттэрин, бэтэрээннэрин улуус салалтатын уонна тус бэйэм ааппыттан Национальнай бэчээт күнүнэн эҕэрдэлиибин! 1907 сыл от ыйын 1 күнүгэр «Саха дойдута» диэн сахалыы хаһыат Саха сирин уһулуччулаах уопсастыбаннай, бэлитиичэскэй диэйэтэлэ, сырдатааччыта Василий Никифоров-Күлүмнүүр уонна кини биир санаалаахтарын көҕүлээһининэн күн сирин көрбүтэ. Бу бастакы уопсастыбаннай-бэлитиичэскэй уонна литературнай таһаарыы бэчээттэниитэ национальнай суруналыыстыка үөскээн, сайдан тахсарыгар, саха литературнай тылын киэҥник тарҕатыыга олук буолбута. Бүгүн эһиги бэчээт үлэтин саҥа сайдыылаах таһымҥа таһааран, аныгы технологиялары, сыыппара кыаҕын сатабыллаахтык туһанан, иһитиннэриини түргэнник уонна киэҥник тарҕатаҕыт. Бу усулуобуйаҕа эһиги билиигит, сатабылгыт, үрдүк эппиэтинэскит улуус бар дьонун санаатын үөскэтиигэ уонна түмүүгэ, төрөөбүт тылы киэҥник тарҕатыыга сүҥкэн суолталаах. Улууспут сүрүн хаһыатын "Саҥа олох" уонна олохтоох телестудия суруналыыстара, полиграфистар, эһиги маастарыстыбаҕыт, идэҕэ бэриниигит, кыһамньыгыт инникитин даҕаны биһиги Чурапчыбыт улууһугар төрөөбүт тыл өрө тутулларын кэрэһитинэн, дьону-сэргэни үтүө дьыалаларга угуйар, түмэр, сомоҕолуур күүһүнэн буолан, олохтоохторго сойбот сонуннары тарҕатыыгыт, национальнай бэчээти сайыннарыыгыт суолтата күннэтэ үрдүү туруо. Эһиэхэ бука барыгытыгар саҥа сэргэх бырайыактары олоххо киллэриигитигэр ситиһиилэри, ааҕааччылар сэҥээриилэрин, тус бэйэҕитигэр уонна чугас дьоҥҥутугар чэгиэн доруобуйаны, дьолу уонна этэҥҥэ буолууну баҕарабын!