Улуус салалтатын саҥа нэдиэлэтээҕи планеркатыгар ыытыллыбыт үлэ түмүктэрэ, саҥа нэдиэлэ...
Улуус салалтатын саҥа нэдиэлэтээҕи планеркатыгар ыытыллыбыт үлэ түмүктэрэ, саҥа нэдиэлэ былааннара көрүлүннүлэр. Планеркаҕа «Дыгын оонньууларын» кыттыылаахтарын, П. Друзьяновы уонна Ю. Копырины чиэстээһин буолла итиэннэ ааспыт нэдиэлэҕэ ыытыллыбыт үлэлэр, улахан тэрээһиннэргэ кыттыы түмүктэрин иһитиннэрдилэр. Улуус баһылыга Степан Саргыдаев быйылгы оттооһуҥҥа Чурапчы улууһа 40 тыһыынча тонна оту бэлэмниир былааннааҕын, 25 механизированнай, 18 полумеханизированнай звенолар окко киирэллэрин, билиҥҥитэ 176 тонна от бэлэмнэммитин, улуус тыа хаһаайыстыбатынан дьарыктанар хаһаайыстыбалара, квота, лимит да буоллар, сэлээркэнэн хааччыллыбыттарын, оттооһуҥҥа улуустааҕы оперштаб үлэлиирин туһунан иһитиннэрдэ. Улуус «Туймаада ньиэп” тэрилтэтин кытта от ыйыгар 91 тонна, атырдьах ыйыгар 71 тонна уматыгы ыларга дуогабар түһэрсибит. Уматыгынан хааччыллыы боппуруоһун улуус баһылыгын бастакы солбуйааччы Рустам Данилов уонна улуус тыа хаһаайыстыбатыгар управлениета хонтуруолга туталлар. Улууска от үүнүүтэ куһаҕана суох, онон ыраах барбакка, кыстыыр оту булунуохха сөп диэн этилиннэ. Улуус баһылыга Чурапчы улууһа спорт хайысхатын таһынан үөрэхтээһиҥҥэ ситиһиилэрин бэлиэтээтэ. Ол курдук, БКЭ саҕаланыаҕыттан үс оҕо 100 баалы ылыыларын, ону таһынан 90-тан тахса бааллаах оҕолор баалларын, барыта 23 предмеккэ үчүгэй көрдөрүүлэр ситиһиллибиттэрин түмүгэр улуус бастыҥнар ахсааннарыгар киирбитэ, бу ситииһии үөрэх хаачыстыбатыгар улахан болҕомто, утумнаах үлэ түмүгэр кэлбитэ ыйылынна. Планеркаҕа баһылык Кэбээйигэ ыытыллыбыт 19 өрөспүүбүлүкэтээҕи Олоҥхо ыһыаҕын ситиһиилэрин, Иван Иванович Брызгаев Чурапчы улууһун историятыгар бастакынан саҥа сокуонунан быыбарданан Соловьев нэһилиэгин баһылыгынан талыллан солотун туппутун тустарынан иһитиннэрдэ. Степан Саргыдаев бары нэһилиэктэргэ, тэрилтэлэргэ оттооһун уонна хас биирдии тэрилтэни кыстыкка бэлэмнээһин, ититэр систиэмэлэри сууйуу, пааспардааһыны ыытыы боппуруостарын күүстээх болҕомтоҕо ыларга сорудахтаата. Үүммүт нэдиэлэҕэ Монреалга ыытыллыбыт олимпийскай оонньуулар чөмпүйүөннэрин өрөгөйдөөх кыайыыларын 50 сылын бэлиэтээһин тэрээһинин, муниципальнай сулууспалаахтарга пиэнсийэни анааһыны көрүү, аны күһүн быыбары ыытыыны тэрийии үлэтин, олох-дьаһах хомунаалынай систиэмэтин кэлэр кыстыкка бэлэмнээһин, улуус бүддьүөтүн уо.д.а. боппуруостарыгар сүбэ мунньахтар, Владивостокка «Малая родина – Сила России” Уһук Илин уокуругун муниципальнай форумугар улуус баһылыга Степан Саргыдаев кыттыыта, Амма өрүс күнүн чэрчитинэн субуотунньуктарга кыттыы, Амма улууһугар культура үлэһиттэрин семинара уо.д.а. былааннаннылар. Полиция отделын иһитиннэриитинэн “Таежный герой» байыаннай спортивнай күрэхтэһиигэ улуустан полиция икки үлэһитин кытта 10 оҕо баран кыттан, 3 миэстэ буолбуттара бэлиэтэннэ. Ааспыт нэдиэлэҕэ микрозайм ылан баран төннөрбөт дьоҥҥо үҥсүүлэр, 380 тыһыынчаҕа диэри түөкүттэргэ албыннатыы, бырааба суох айаннааһын, арыгы испит суоппары тутуу, суол быраабылатын кэһии түмүгэр массыынаны штрафстоянкаҕа туруоруу бэлиэтэммит. Маны таһынан улууска дропперство диэнинэн икки түгэн регистрацияламмыт. Бу күннэргэ биир кыыс бааҥҥа бэйэ дааннайын түөкүттэргэ этэн биэриитин түмүгэр албыҥҥа киирэн биэрбит. Улуус баһылыга Степан Саргыдаев Россия тас өттүттэн бүтүн компаниялар тэрээһиннээхтик үлэлээн, дьонтон албыннаан, өстөөҕү сэбилээһиҥҥэ үбү тарда олороллоругар киирэн биэриини, чэпчэки, түргэн харчыга ымсыыран, түөкүттэргэ, араас пирамидаларга бэйэ харчытын ыыта олорууну утары үлэни күүһүрдэргэ, айылҕа баһаардарыттан сэрэхтээх буолууга, оттооһуҥҥа бары күүһү уурууга нэһилиэнньэҕэ сырдатар, сэрэтэр информационнай үлэни тэрээһиннээхтик ыытарга сорудахтаата.