2046 сылга диэри гаастааһын ситимин саҥа схемата былааннанар — 17 июня 2026 г. в 09:24:50.927
2046 сылга диэри гаастааһын ситимин саҥа схемата былааннанар Бүгүҥҥү күҥҥэ Нам улууһа тэтимнээхтик сайдар. Улууска 2046 сылга диэри гаас ситимин кэҥэтии схематын оҥорууга үлэ барар. Бу — инники 20 сылга туһуламмыт улахан хардыы уонна сайдыы суола буолар. Бу хайысха Саха Өрөспүүбүлүкэтин үрдүнэн ыытыллар уонна СӨ Промышленноска уонна геологияҕа министерствотын уонна «Газпром промгаз» АО икки ардыларынааҕы государственнай контракт чэрчитинэн олохтоммут кэскиллээх чинчийэр үлэҕэ олоҕурар. Улуус баһылыга Юрий Слепцов бэлиэтээбитинэн, хас биирдии нэһилиэги уонна улуус киинин 2046 сылга диэри гааһынан хааччыйыы инники былаанын чопчулааһын — олохтоох дьон олоҕун таһымын тупсарыыга уонна улуус экономикатын сайыннарыыга улахан суолталаах. Кэскиллээх бырайыагы кэмигэр уонна толору оҥорон тиэрдэр туһуттан, улуус баһылыга Юрий Иннокентьевич кэлэр 20 сылга нэһилиэнньэлээх пууннар территориялара улаатарын толору учуоттаан, баар былааннары бырайыактыыр тэрилтэлэргэ эппиэтинэстээхтик түмэн тиэрдэргэ хас биирдии нэһилиэк баһылыгар уонна тустаах салайааччыларга, специалистарга үлэни бииргэ былааннаахтык ыытарга сорук туруорда. «Нам улууһа» МО пресс-сулууспата