Бэс ыйын 16 күнүгэр ытыктыыр, убаастыыр киэн туттар биир дойдулаахпыт, үлэ ветерана, С... — 17 июня 2026 г. в 02:54:53.921
Бэс ыйын 16 күнүгэр ытыктыыр, убаастыыр киэн туттар биир дойдулаахпыт, үлэ ветерана, Саха Республикатын үөрэҕириитин үтүөлээх үлэһитэ, Российскай Федерация үөрэҕириитин туйгуна, СӨ бэчээтин туйгуна, “Саха Республикатын педагогическай династията” бэлиэ хаһаайына, Нам улууһун, Ленскэй уонна Бөтүҥ нэһилиэктэрин Бочуоттаах гражданина, Бочуотунай меценат, буойун-интернационалист, Вьетнам сэриитин ветерана Сивцев Тит Ефремович уһун ыарахан ыарыыттан олохтон барда. Тит Ефремович талан ылбыт идэтигэр бэриниилээхтик үлэлээн, үөрэҕирии, бэйэни салайыныы, полиграфия эйгэлэригэр сүҥкэн кылаатын киллэрбитэ. Өр сылларга история учууталынан, оскуола директорынан, сельсовет председателинэн, Нам оройуонунааҕы типография, кэлин “Сахаполиграфиздат” генеральнай директорынан таһаарыылаахтык үлэлээбитэ. Салайар үлэлэргэ мэлдьитин күүһүн-уоҕун, сатабылын барытын ууран, үлэ-хамнас ситиһиилээх буоларыгар турууласпыта. Оҕо сааһыттан үлэҕэ эриллэн олоҕу сыаналыы үөрэммитэ. Сахалыы-сайаҕас, чиэһинэй, хайдах да ыарахантан чаҕыйбат, ыктарыылаах да кэмнэргэ ыгылыйбат майгытынан, тулалыыр дьонугар-сэргэтигэр өрүү болҕомтолоох, үтүөкэннээх сыһыанынан дьон-сэргэ убаастабылынан туһанара. Буойун-интернационалист Тит Сивцев Въетнамы көмүскээһиҥҥэ, кыраныыссатын бөҕөргөтүүгэ хорсуннук сэриилэспитэ, кыргыстаах сэрии уотун эрдээхтик тулуйбута. Билиҥҥи кэмҥэ төрөөбүт дойдуга тапталы, бэриниилээх буолууну, ыччаты кыра сааһыттан патриотическай тыыҥҥа иитиигэ үтүө холобур буолбута. Тапталлаах аҕата, саха биллиилээх поэта, уус-уран тыл хатыламмат маастара, тылбаасчыт Ефрем Степанович маастара Сивцев-Таллан Бүрэ олоҕун, үлэтин-хамнаһын үйэтитиигэ, меценат быһыытынан улахан үлэни ыыппыта. Нам улууһун землячествотыгар биир дойдулаахтарбытын түмүүгэ, сомоҕолооһуҥҥа, улуус сайдыытыгар сүҥкэн кылаатын киллэрбитэ. Нам улууһун үлэнэн аатырдыбыт киһи Тит Ефремович Сивцев дьоһун олоҕо киэҥ ыырдаах, үрдүк аартыктаах, уһун айаннаах. Кини олоҕо, үлэтэ-хамнаһа сыл-хонук сыыдамнык устан аастаҕын аайы көлүөнэттэн көлүөнэҕэ бэриллэн, кэрэни, үтүөнү айарга сирдьит буолуоҕа. «Нам улууһа» муниципальнай оройуон дьаһалтата