2026 сыл бэс ыйын 15 күнүгэр Көбөкөн нэһилиэгин депутаттар Сэбиэттэрин мунньаҕар муници... — 1 июля 2026 г. в 02:33:10.064
2026 сыл бэс ыйын 15 күнүгэр Көбөкөн нэһилиэгин депутаттар Сэбиэттэрин мунньаҕар муниципальнай тэриллии баһылыгын талбыттара. Саҥа сокуоҥҥа олоҕуран, конкурснай комиссия түмүгүнэн депутаттар элбэх куоластарын ылан Илларион Илларионович Пестеревы «Көбөкөн нэһилиэгэ» тыа сирин түөлбэтин баһылыгынан талылынна. Бу Саха Өрөспүүбүлүкэтигэр нэһилиэк таһымыгар баһылыгы сокуон саҥа ирдэбилинэн талыы бастакынан олоххо киириитэ буолар. Көбөкөн нэһилиэгин депутаттарын Сэбиэтин бэрэссэдээтэлин солбуйааччы Мария Николаевна Сокольникова Илларион Илларионович Пестеров «Көбөкөн нэһилиэгэ» тыа сирин түөлбэтин баһылыгынан талыллыбытын туһунан быһаарыыны (решение) ааҕан иһитиннэрдэ уонна саҥа талыллыбыт баһылыкка дастабырыанньа туттарда. Түөскэ кэтиллэр үрүҥ көмүс бэлиэни нэһилиэк баһылыгынан үлэлээбит Гаврил Михайлович Гоголев кэтэртэ. Ол кэннэ Илларион Илларионович дьонун-сэргэтин иннигэр андаҕар биэрдэ уонна махтал тылын эттэ. Сайдыы суолун тутуһа, сарсыҥҥы күнү түстэһэ, сүбэни-соргуну түмэ бүгүҥҥү үөрүүлээх тэрээһиҥҥэ элбэх эҕэрдэ, алгыс тыл этилиннэ. Үтүө мааны Көбөкөн нэһилиэгин олохтоохторо кэлэр кэм кэскилин түстээн, биир санаанан салайтаран, баһылык Илларион Пестерев тула биир сомоҕо буолан түмсэн, нэһилиэк сайдарын туһугар күүс-көмө, өйөбүл буолуохтара диэн эрэнэбит. ⤵️