Кыстыкка бэлэмнэнии боппуруостарыгар мунньах буолла — 23 июля 2026 г. в 09:24:12.431
Кыстыкка бэлэмнэнии боппуруостарыгар мунньах буолла «Нам улууһа» МО баһылыгын эбээһинэһин толорооччу Анатолий Павлов 2026–2027 сыллааҕы оттук сезонугар бэлэмнэнии үлэлэр боппуруостарыгар мунньаҕы салайан ыытта. Мунньахха улуус дьаһалтатын отделларын, управлениеларын салайааччылара, специалистара, "Ленскэй нэһилиэк" ТСТ баһылыгын солбуйааччы, «Сахатранснефтегаз» АО Намнааҕы учаастагын салайааччыта уонна «Намкоммунтеплоэнерго» АО кылаабынай инженера кыттыыны ыллылар уонна бэйэлэрин хайысхаларынан оттук сезонугар бэлэмнэнии үлэлэр хайдах бара туралларын туһунан иһитиннэрии оҥордулар. Анатолий Иванович кыстыгы этэҥҥэ, туох да саахала суох туоруур туһугар, бэлэмнэнии үлэлэрин үрдүк хааччыстыбалаахтык уонна кэмигэр бүтэрэргэ кытаанах сыал-сорук туруорда. Бу үлэлэри кэмигэр ыытар туһугар, ыам ыйын 15 күнүгэр улуус баһылыгын 1453-р №-дээх «О начале подготовки к отопительному сезону на 2026–2027 гг. на территории муниципального района «Намский улус» дьаһала тахсыбыта. Оттук сезонугар бэлэмнэнии боппуруоһа улуус салалтатын ураты хонтуруолугар турар. «Нам улууһа» МО пресс-сулууспата