✅Тардыллыбыт гаас ситимнээх (стояктаах), ол эрээри хас да сыл устата тутуллубакка турар...
✅Тардыллыбыт гаас ситимнээх (стояктаах), ол эрээри хас да сыл устата тутуллубакка турар дьиэлэр испииһэктэрин саҥардарга нэһилиэктэр баһылыктарыгар сорудах бэрилиннэ. ✅Улуустааҕы Культура уонна духуобунай сайдыы управлениетын начальнигын солбуйааччы Александра Новгородова иһитиннэрбитинэн, Санкт-Петербург куоракка экспедицияҕа сылдьыбыт бөлөх бэҕэһээ, алтынньы 18 күнүгэр, эргиллэн кэлбит. Кинилэр сотору кэминэн улуус баһылыгын кытары көрсөн, экспедиция үлэтин түмүгүн билиһиннэриэхтэрэ. ✅Алтынньы 23-24 күннэригэр СССР Художниктарын сойууһун чилиэнэ, Саха сиригэр оҕо кинигэтин графикатын олохтооччу, биллиилээх график уонна живописец Ефим Михайлович Шапошников төрөөбүтэ 100 сыллаах үбүлүөйүгэр аналлаах бэлиэ тэрээһиннэр ыытыллыахтара. ✅Алтынньы 23 күнүгэр улууска тимири уһаарыы сөргүтүллүбүтэ 15 сылыгар аналлаах республиканскай «Уоттаах тимир” тэрээһин ыытыллыаҕа. ✅М.К. Аммосов аатынан культура уонна духуобунай сайдыы дыбарыаһыгар алтынньы 23 күнүгэр үбүлүөйдээх 70-с үлэ сезонун арыйар уус-уран самодеятельность кыттыылаах үөрүүлээх кэнсиэр ыытыллыаҕа. ✅Улуустааҕы Социальнай харалта управлениетын салайааччыта Людмила Петрова социальнай контракка төһө квота хаалбытын билиһиннэрдэ. Социальнай контракт хаалбыт квоталара: • Бэйэ дьыалатын тэринии (ИП/Самозанятость) — 3 квота; • СВО кыттыылааҕар бэйэ дьыалатын тэриниитигэр — 1 квота; • Кэтэх хаһаайыстыбаны тэринии, техника атыылаһыыта (ЛПХ) — 4 квота. ✅МКУ «Биир кэлим заказчик сулууспатын» салайааччыта Алексей Кондаков нэһилиэктэр баһылыктарыгар суол фондатын хонтуруоллуур системаҕа (СКДФ) улуустааҕы айан суолларын туруктарын, кыраныыссаларын уонна суол үлэтигэр көрүллүбүт харчы туһаныллыытын туһунан толору чахчылары (дааннайдары) киллэрэр үлэни былааннаахтык күүһүрдэллэригэр эттэ. ✅Бизнес - киин дириэктэрэ Борис Бугаев ахсынньыга Нам улууһуттан төрүттээх, куоракка олорор уонна олохтоох эдэр урбаанньыттарга аналлаах форум ыытыллыаҕа диэн иһитиннэрдэ. Мунньах түмүгүнэн улуус баһылыга Юрий Слепцов салайааччыларга уонна нэһилиэктэр баһылыктарыгар кыстык кэмигэр нэһилиэнньэ куттал суох буолуутун хааччыйыыга уонна былааннаммыт үлэлэри кэмигэр түмүктүүргэ ураты болҕомтону уурар туһунан сорудахтары туруорда. «Нам улууһа” МО пресс - сулууспата