Нам улууһугар «2026 сыл бастыҥ учуутала» куонкурус түмүктэннэ.
Нам улууһугар «2026 сыл бастыҥ учуутала» куонкурус түмүктэннэ. Икки күн устата улуус оскуолаларыттан 8 кыттааччы – И.Е. Винокуров аатынан Хатыҥ Арыы оскуолатын химия учуутала Анна Геннадиевна Попова, И.С. Гаврильев аатынан Нам 1 №-дээх оскуолатын география учуутала Татьяна Андреевна Эверстова, Нам 2 №-дээх оскуолатын английскай тыл учуутала Дьулустаан Иванович Новиков, Модут оскуолатын алын сүһүөх кылаас учуутала Туйаара Николаевна Гадимова, Е.М. Шапошников аатынан Хамаҕатта орто оскуолатын алын сүһүөх кылаас учуутала Александра Аркадьевна Скрябина, Партизан орто оскуолатын математика учуутала Нария Прокопьевна Слепцова, З.П. Саввин аатынан Үөдэй орто оскуолатын история уонна обществознание учуутала Петр Петрович Степанов, Д.Ф. Алексеев аатынан 1 Хомустаах орто оскуолатын нуучча тылын уонна литературатын учуутала Сусанна Нюргустановна Эверстова 5 түһүмэҕинэн араас тургутуулары аастылар. Ол курдук, аһаҕас уруоктары, маастар-кылаастары биэрдилэр, «Педагогическай интервью» түһүмэххэ бэйэлэрин көрүүлэрин тиэртилэр, блиц-турнирга, үөрэтэр форсажка уопуттарын үллэһиннилэр. «Көрөөччү биһирэбилэ» номинация кыайыылааҕа, Модут оскуолатын алын сүһүөх кылаас учуутала Туйаара Гадимова, куйаар ситимин нөҥүө куоластааһынынан быһаарылынна. Куонкурус бастакы күнэ И.С. Гаврильев аатынан Нам 1 №-дээх оскуолатыгар, оттон иккис быһаарыылаах күнэ Модут орто оскуолатын баазаларыгар тэрилиннилэр. «Сыл учуутала – 2026» күөн күрэс кыайыылааҕынан тахсыбыт Нам 2 №-дээх оскуолатын английскай тыл учуутала Дьулустаан Новиков республикатааҕы түһүмэххэ Нам улууһун чиэһин көмүскүөҕэ. Эҕэрдэлиибит, ситиһиилэри баҕарабыт! “Нам улууһа” МО пресс-сулууспата