Бу үөрүүлээх күн Хамаҕатта, улуус олохтоохторугар ураты историялаах кэрэ-бэлиэ түгэнинэ...
Бу үөрүүлээх күн Хамаҕатта, улуус олохтоохторугар ураты историялаах кэрэ-бэлиэ түгэнинэн бэлиэтэннэ. Нам улууһун уонна Хамаҕатта нэһилиэгин Ытык киһитэ, Ленинград блокадатын кыттыылааҕа, доруобуйа харыстабылын эйгэтигэр өр сылларга эҥкилэ суох үтүө суобастаахтык үлэлээбит үлэ бэтэрээнэ Эльви Давыдовна Ушницкая аата саҥа арыллыбыт Кириэс-Кытыллааҕы быраас амбулаториятыгар иҥэрилиннэ. Саҥа вывесканы үөрүүлээх быһыыга-майгыга астылар Эльви Давыдовна Ушницкая, улуус баһылыга Юрий Слепцов, нэһилиэк баһылыга Евгений Ушницкай, кылаабынай быраас Ариан Сергеев уонна амбулатория сэбиэдиссэйэ Марина Гоголева. Ытык киһи Эльви Давыдовна бэйэтин ис сүрэҕиттэн махтал уонна барҕа эҕэрдэ тылын бар дьонугар тиэртэ. Улуустааҕы үөрүүлээх чаас Валентина Иванова толоруутугар «Алгыс» ырыанан ситэрилиннэ. Ону таһынан, врачебнай амбулатория үлэһиттэрэ уонна кинилэргэ шефтэһэр 3-һүс нүөмэрдээх Кириэс-Кытыллааҕы баһаары утары охсуһар этэрээт байыастара (караул начальнига Колпашников Ариян Васильевич) уопсай эҕэрдэ ырыанан кыттыыны ыллылар. Бэлиэ тэрээһин кыттыылаахтарын дохсун ытыстарын тыаһынан уонна ис сүрэхтэн махтал тылларынан ыҥырыллан таҕыстылар олохтоох дьон туруктаах, чэгиэн буолалларыгар сыраларын уурар үлэлиир амбулатория үлэһиттэрэ: М.А. Гоголева, И.Н. Гурьева, З.А. Герасимова, М.П. Попова, М.С. Ачикасова, В.М. Афанасьева, Е.Д. Яковлева уонна С.Г. Иванов. Улуус баһылыга Юрий Слепцов, Хамаҕатта нэһилиэгин баһылыга Евгений Ушницкай уонна кылаабынай быраас Ариян Сергеев олохтоохтору, балыыһа үлэһиттэрин саҥа эбийиэк аһыллыбытынан ис сүрэхтэриттэн эҕэрдэлээтилэр. Кинилэр уһуннук уонна үтүө суобастаахтык үлэлии сылдьар медицина үлэһиттэригэр уонна тутааччыларга махтанан туран Бочуотунай грамоталары, Махтал суруктары, тыыннаах сибэккилэри үөрүүлээх быһыыга-майгыга туттардылар. ⤵️