МН

МР «Нюрбинский район»

Госорганы и учреждения · 6 ноября 2026 г.

Открыть канал в MAX

Суруллубукка хоруй эбэтэр Спортивнай оонньууларга көмө туһунан

Суруллубукка хоруй эбэтэр Спортивнай оонньууларга көмө туһунан   Аҕыйах хонуктааҕыта Интернет ситимигэр (Аартык.ру) оройуонун ыйбакка эрэ үлэһиттэртэн биир ыйдааҕы хамнаһы ыган туран хомуйан эрэллэрин туһунан суруйбут суруктара таҕыста. Ааптара биллибэт да буоллар, сүнньүнэн сөпкө суруйбут, сөптөөх боппуруостары туруорбут. Ол иһин киэҥ соҕустук эппиэттиири наадалааҕынан ааҕабыт. Кылгастык хоруйдаатахха сымсах соҕус буолуо. Бастакытынан, кэнники кэмҥэ нэһилиэнньэттэн араас хайысхаларга (СВО, араас объектары тутууга, айылҕа иэдээннэрин хоромньуларын туоратыыга, бырааһынньыктарга уо.д.а.) үп-харчы хомуйуута наһаа элбээтэ диэн суруйбут. СВО-ҕа харчы хомуйуу хас биирдии киһи тус иэһэ дии саныыбыт. Атын дойдулар сэрии кэмигэр анал «байыаннай нолуогу» олохтуур буоллахтарына, биһиги дойдубут оннук нолуогу олохтообокко олорор. Арассыыйа инники дьылҕата тутулуктаах, онон дойдубут кыайарын туһугар хас биирдии киһи булгуччу көмөлөһүөхтээх. Нэһилиэктэргэ барар тутуулары этэр буоллахха: билигин судаарыстыба туох эмэ тутууга, ханнык эмэ бырайыакка үп биэрэр буоллаҕына нэһилиэнньэттэн кыттыгас үп баар буоларын кэтэһэр. Ол эбэтэр бу харчы көрдүүр нэһилиэк бу бырайыакка дьиҥнээхтик наадыйарын дуу, суоҕун дуу тургутан көрөллөр. Ким да биэриэн баҕарбат буоллаҕына, бу нэһилиэк олохтоохторугар наадата суох эбит диэн түмүк оҥоһуллар. Атын маннык ирээттэһэр үбүлүүр, бу объекка дьиҥнээхтик наадыйар түмсүүлээх нэһилиэк олус элбэх. Ньурба оройуонугар бырааһынньыктарга харчы хомуллубат, арай ыһыахха эрэ урбаанньыттартан сүнньүнэн табаарынан хомуур барар. Биһиги урбаанньыттарбыт ыһыахха үөрэ-көтө көмөлөһөллөр дии саныыбыт. Норуот бырааһынньыга буоллаҕа. Арай урут Таркаайылар ыһыахтарыгар 6 мөл. солк курдугу хомуйан, олус үчугэй ыһыаҕы тэрийдилэр диэн сонун баар этэ. Иккис боппуруос: өскөтүн оройуоҥҥа өрөспүүбүлүкэ таһымнаах тэрээһин буолар буоллаҕына, өрөспүүбүлүкэ бюджетыгар төһө эмэ үп угуллубут кээмэйин иһинэн барыахтаах диэн эмиэ сөпкө этиллибит. Биһиэхэ буолар Саха Өрөспүүбүлүкэтин норуоттарын IX Спортивнай оонньууларын тэрээһинигэр өрөспүүбүлүкэ бюджетыттан элбэх үп көрүллэн турар. 2027 сылга эмиэ көрүллэрэ күүтүллэр. Туох-баар күрэхтэһиилэри ыытыы, наҕараадалааһын – Спорт министиэристибэтигэр, култуура тэрээһиннэрин ыытыы - Култуура министиэристибэтигэр сүктэриллэн турар. Министиэристибэлэргэ бюджеттан көрүллүбут үп иһинэн. Маны барытын СӨ Бырабыыталыстыбатын тэрийэр кэмитиэтэ иилиир-саҕалыыр, салайааччыта - Бырабыыталыстыба Бэрэссэдээтэлин солбуйааччыта С.В.Местников. Оройуоннар спортивнай делегациялара хонор сирдэрин ороскуотун, аһыыр астарын хааччыйыытын бэйэлэрин оройуоннара үбүлүүр. Онон бу IX Спортивнай оонньуулар сүрүн тэрээһиннэригэр оройуон үбэ ороскуоттаммат. Арай Ньурба оройуонун чиэһин көмүскүүр спортсменнарбыт бэлэмнэниилэригэр, спортивнай форманан хааччыйыыга, Оонньуу кэмигэр аһыыр ороскуоттара эрэ бэйэбит бюджеппытын суотугар буолар. Үсүһүнэн, бу маннык харчы хомуура бардаҕына, хомуллубут үп туохха туттулларын, ким онно эппиэттиирин билиэхтээхпит диэн сөпкө этэр. Элбэх киһи маннык санаалаах. Ол эрээри Фонда үбэ ханна туттуллуохтааҕын элбэхтэ суруйан, кэпсээн турабыт. Нэһилиэктэринэн сылдьарбыт тухары кэпсии-ипсии сылдьабыт, оройуон хаһыатыгар эмиэ хаста да бэчээттэнэн турар. Ханнык баҕарар маннык тэрээһиннэр буолар оройуоннара, дьоһуннаах хаһаайын быһыытынан, хаһан да сылдьыбатах ыраахтан кэлэр ыалдьыттары дьиэлэрин-уоттарын оҥостон, хомунан көрсөллөрүн курдук, муҥутуур киэргэнэн-тупсан көрсөллөр. Ааһа баран эттэххэ, ыаллар эмиэ олбуордарын оҥостоллор, кырааскаланаллар. Маннык тэрээһиннэр буолан ааспыт улуустарын олохтоохторо (Уус-Алдан, Таатта) фондаларыгар 60-40 мөл. солк хомуйан тураллар. Биһиги, Ньурбалар, эмиэ дьон сиэринэн, ох курдук оҥостон, дьиэбитин-уоппутун тупсарынан, нэһилиэктэрбитин киэргэтэн көрсүөхтээхпит. Дьиҥинэн, урукку курдук “АЛРОСА” хампааанньаны кытта сөбүлэһиибит быһыытынан бэриллэр үбүн, сыллааҕы дивиденын биэрэ олорбута буоллар, маннык Фонда тэринэр наадата да суох этэ, дьоммутун кыһалҕалыа суох этибит.