Күндү ийэлэр, аҕалар, ытыктабыллаах Таатта улууһун олохтоохторо!
Күндү ийэлэр, аҕалар, ытыктабыллаах Таатта улууһун олохтоохторо! Таатта улууһун дьаһалтатын, тус бэйэм ааппыттан Эһигини саамай сырдык, иһирэх уонна дьоһун бырааһынньыктарбытынан — Саха Өрөспүүбүлүкэтигэр Ийэ күнүнэн уонна Арассыыйабыт үрдүнэн бэлиэтэнэр Аҕа күнүнэн итиитик-истиҥник эҕэрдэлиибин! Ийэ уонна Аҕа — хас биирдии киһи олоҕор саамай күндү, эрэллээх уонна ытыктыыр дьоно буолаллар. Кинилэр дьиэ кэргэн бигэ тирэҕин, ил-эйэтин уонна кэлэр көлүөнэни иитэн-уһуйан таһаарар сүрүн олугун уураллар. Ийэ сылаас таптала, муударай сүбэтэ оҕону кэрэҕэ, үтүөгэ сирдиир буоллаҕына, Аҕа эрэллээх хаххата, бэриниилээх холобура уонна хорсун майгыта олоххо эрэллээх буолууну биэрэр. Биһиги Тааттабыт сирэ — норуоппут духуобунаһын, төрүт сыаннастарын уонна дьиэ кэргэн иллээх үгэстэрин куруук үрдүктүк тутар ытык улуус. Оҕолорун Аҕа дойдуга бэриниилээх, патриот санаалаах, туруу үлэһит дьон гына иитэн таһаарбыт ийэлэрбитигэр уонна аҕаларбытыгар туспа дириҥ махталы тиэрдэбин. Ордук бу уустук, эппиэтинэстээх кэмҥэ Аҕа дойду көмүскэлигэр сылдьар хорсун буойуттарбыт дьиэ кэргэттэригэр, ийэлэригэр уонна аҕаларыгар тулуурдарыгар, бигэ санааларыгар сүгүрүйэбин. Күндү ийэлэр уонна аҕалар! Бу бэлиэ күн Эһиэхэ уонна эһиги дьиэ кэргэттэргитигэр сахалыы чэгиэн туругу, уостубат дууһа сылааһын, дьолу-соргуну уонна олоххо бигэ эрэли баҕарабын! Хас биирдии дьиэҕэ оҕо мичээрэ, үөрүүтэ-көтүүтэ иһилиннин, дьиэ кэргэттэргитигэр өрүү ил-эйэ уонна убаастабыл аргыстастын! Таатта улууһун баһылыга Айаал Бурцев 📲МАХ|