«ИОНОВТАР НЭҺИЛИЭСТИБЭЛЭРЭ» КИНИГЭ БИҺИРЭМЭ ЫЫТЫЛЫННА
«ИОНОВТАР НЭҺИЛИЭСТИБЭЛЭРЭ» КИНИГЭ БИҺИРЭМЭ ЫЫТЫЛЫННА 📚🏛️Бүгүн, алтынньы 27 күнүгэр, улуус дьаһалтатын мунньахтыыр саалыгар Саха сирин устуоруйатыгар, этнографиятыгар уонна фольклоругар сүҥкэн суолталаах «Ионовтар нэһилиэстибэлэрэ» сборник-кинигэ үөрүүлээх биһирэмэ ааста. Сборникка саха чулуу этнограбыгар, фольклориһыгар Мария Николаевна Андросова-Ионоваҕа уонна кини кэргэнигэр, учуонай Всеволод Михайлович Ионовка сыһыаннаах Санкт-Петербург куорат архыыптарыттан (Россия Наукаларын Академиятын архивын филиалыттан, түмэллэр уонна Э. К. Пекарскай фондаларыттан) хомуллубут саҥа, уникальнай матырыйааллар, илиинэн суруллубут рукописьтар, сахалыы буквардар уонна былыргы хаартыскалар бэчээттэнэн киирдилэр. Бу сүдү үлэ «Наследие Ионов» бырайыак ааптара Петр Дмитриевич Петров көҕүлээһининэн, «Тааттаавтодор» АО генеральнай дириэктэрэ Иван Иванович Бочонин уонна «Монтажник» ПК салайааччыта Александр Александрович Ханин үбүлээһиннэринэн олоххо киирдэ. Чинчийэр экспедицияҕа уонна матырыйааллары бэлэмнээһиҥҥэ «Таатта» музей үлэһитэ Александра Постникова, библиограф Анна Монастырева, суруйааччы, историк Утум Захаров уонна Таатта библиотеката олус сүҥкэн үлэни ыыттылар. 💬 Таатта улууһун баһылыга Айаал Бурцев кинигэҕэ киирбит аан тылыгар бэлиэтээбитинэн: «Мария Николаевна уонна Всеволод Михайлович Ионовтар саха норуотун былыргытын, фольклорун, итэҕэлин харыстааһыҥҥа киллэрбит кылааттара — көмүс мэтээлинэн наҕараадаланар духуобунай нэһилиэстибэ буолар. Бу фундаментальнай үлэ 2030 сыллаахха Тааттабытыгар ыытыллыахтаах Олонхо ыһыаҕар уонна 2032 сыллаахха бэлиэтэниэхтээх Саха сирэ Россияҕа киирбитэ 400 сыллаах үбүлүөйүгэр улахан наука бэлэҕэ буолар!» Саха омук силиһин, тылын уонна өбүгэ итэҕэлин чинчийэр «Ионовтар нэһилиэстибэлэрэ» кинигэ кэлэр көлүөнэ ыччакка уонна билим эйгэтигэр уостубат бэлэх буолла. 📲МАХ|