Ыам ыйын 21 – 26 күннэригэр Москуба куоракка XI төгүлүн Аан дойдутааҕы “Добровидение - ... — 28 мая 2026 г. в 04:25:55.949
Ыам ыйын 21 – 26 күннэригэр Москуба куоракка XI төгүлүн Аан дойдутааҕы “Добровидение - 2026” норуот ырыатын бэстибээлигэр Чурапчы улууһун, Алаҕар нэһилиэгиттэн Ф.Гоголев аатынан Чыаппаратааҕы эр дьон народнай хора кыттыыны ылла. “Добровидение” норуоттар култуураларын көрөдөрөр биир бастыҥ улахан бэстибээл ааптарынан буолар РФ Государственнай дума депутата Олег Анатольевич Нилов. Быйылгы бэстибээлгэ 30 тахса кэллэктиип, 1000 тахса кыттааччы кыттынна. Москуба куоракка 6 күн устата куораты көрөн, ыллаан, улахан сыанаҕа кыттан, историяҕа киирэр, кэрэ бэлиэ күннэрдээх, киэҥ быраграаммаллаах тэрээһиҥҥэ кыттыбыппытыттан астынан кэллибит. Ол курдук, самаан сайыны көрсө ыам ыйын 22 күнүгэр РФ президенин иһинэн СӨ бастайааннай бэрэстэбиитилстибэтин дьиэтигэр Ф.Гоголев аатынан Чыаппаратааҕы эр дьон народнай хорун кэнсиэрэ буолла. Москуба куоракка олорор биир дойдулаахтарбытын мунньан, ыллаан, алгыс тылбытын этэн, оһуохайдаан дойдуларын ахтыбыт дьоҥҥо дойдубут салгынын, тыынын бэлэхтээтибит. Дойдубут дьоно үөрэн, махтал тылларын эттилэр. Бэстибээл Москуба куорат 3 улахан балассааккаларыгар ыытылынна: - Ыам ыйын 24 күнүгэр – Союзтар дьиэлэрин Колоннай саалатыгар бэстибээл аһыллыытыгар В.М.Новиков – Күннүк Уурастыырап тылларыгар, Л.К. Сивухин обработкатыгар “Көлүкэчээн” ырыаны толорон, кыттыыны ыллыбыт. - Ыам 25 күнүгэр – бэстибээлбит гала – кэнсиэригэр Храм Христа Спасителя уонна Государственнай Кремлевскай дыбарыаска кыттар чиэскэ тигистибит. Ырыабытыгар, тойукпутугар көрөөччү дохсун ытыс тыаһа биһигини долгутта, Сахабыт ырыатын – тойугун улахан түһүлгэҕэ иһитиннэрдибит, онтон бэйэбит да астынныбыт. Ону тэҥэ биһигини кытта Раиса Иннокентьевна Винокурова салайааччылаах Дьокуускай куорат “Арчы дьиэтин” иһинэн “Истиҥ” ырыа ансаамбыла кыттыыны ылла. Бэстибээлгэ кыттын диэн ыҥырыыны ыыппыт “Северный Колорит” айар түмсүүгэ, бэстибээлгэ кытыннарбыт, күндү дьоммтугар Варвара Валерьевна Обоюковаҕа уонна кураторбытыгар эдэр уолбутугар Карл Капитновка барҕа махтал тылларбытын тиэрдэбит. Махтанабыт хорбут коллективыгар, уолаттарбытыгар, дьиэ кэргэттэригэр. Уолаттар кыаллыбат диэн тылы туттубакка күүстээх санааны өрө тутан нэһилиэкпит, улууспут, өрөспүүбүлүкэбит иннигэр хорсун быһыыны оҥорон улахан историяҕа киирдибит.