Яуымбай мәктәбе уҡыусылары, спилс-карталарҙы тиҙлеккә йыйыу буйынса географик турнирҙың...
Яуымбай мәктәбе уҡыусылары, спилс-карталарҙы тиҙлеккә йыйыу буйынса географик турнирҙың муниципаль этабында ҡатнашып, республика этабына сыҡҡайны. Уларға республика ярышына ла юл төштө. Яуымбай командаһы һынатманы! 28 май көнө баш ҡалабыҙ Өфөлә Спилс-карталарҙы тиҙлеккә йыйыу буйынса республика географик турниры үтте. Беҙҙең райондың йыйылма командаһы составына Яуымбай мәктәбенең 8-се синыф уҡыусылары Миңзиә Вәлитова, Заһит Мостафин, Нурия Хәйбуллина инде. Улар Рәсәй картаһын, Башҡортостан картаһын йыйыу буйынса 35 команда араһында юғары һөҙөмтәләргә өлгәште. Һөҙөмтәләр ошолай: командалар араһында – Рәсәй картаһын йыйыуҙа 1-се урын, шәхси беренселектә Нурия Хәйбуллина – Рәсәй картаһын йыйыу буйынса 2-се урында, Башҡортостан картаһын йыйыуҙа 3-сө урында. Афарин, яуымбайҙар! Уҡыусыларҙың уңышында Яуымбай мәктәбенең география уҡытыусыһы Фаяз Бирғәле улы Ғизәтуллиндың өлөшө баһалап бөткөһөҙ булды. Атайҙар – ауыл фермеры Хәйбуллин Фәһим Мөхәмәт улы менән МХО яугиры Муллағолов Ишморат Марат улы, шулай уҡ уҡытыусы Фаяз Бирғәле улы бергәләшеп мәктәпкә спилс-карталарҙы алған. Уҡыусылар тәнәфестәрҙә, дәрестәрҙән һуң да ошо карталарҙы йыйыу менән бик ныҡ мауығып китте. Даими күнегеүҙәр уларға ярышта уңыш килтерҙе лә инде. Сәйҙә СӘЙӘХОВА, Бөрйән районы Байназар мәктәбе уҡытыусыһы.