Непэ Гуманитар ушэтынхэмкIэ адыгэ республикэ институтэу КIэрэщэ Тембот ыцIэкIэ щытым щы... — 23 апреля 2026 г. в 12:49:22.622
Непэ Гуманитар ушэтынхэмкIэ адыгэ республикэ институтэу КIэрэщэ Тембот ыцIэкIэ щытым щыжъотыгъ. Институтым ихьакIэщ къеблэгъагъэх шIэныгъэлэжьхэр, тхакIохэр, лъэпкъым ицIыф хэхыгъэхэр, культурэм ыкIи къэбарлъыгъэIэс амалхэм яIофышIэхэр, студентхэр, къуаджэу Гъобэкъуае иныбжьыкIэхэр. Ушъхьагъу дахэу ащ фэхъугъэр - филологие шIэныгъэхэмкIэ докторэу, ГУАРИ-м ипащэ шIэныгъэмкIэ игуадзэу Биданэкъо Марзет зэхигъэуцогъэ тхылъэу «Гъобэкъое тхыдэIуатэхэм яхьакIэщ къэбархэр» зыфиIорэм илъэтегъэуцо фэгъэхьыгъэ Iэнэ хъураеу «Адыгэ IорIуатэр – лъэпкъым ибаиныгъ» зыфиIорэр ары. КIэщакIо фэхъугъэр ыкIи зэхахьэр зезыщагъэр – IорIотэ отделым иIофышIэу Нэхэе Саид. Илъэс пчъагъэм къыкIоцI Биданэкъо Марзет зыдэлэжьэгъэ тхылъым ичылэ гупсэ къыщаугъоижьыгъэ, щатхыжьыгъэ IорыIотэ зэфэшъхьафыбэ къыдэхьагъ. Ахэр къэзыIотагъэ тхыдэIуатэхэри тиIофшIэгъу ихьатыркIэ тарихъым хэтхагъэ хъугъэ. Iофыгъошхо Биданэкъо Марзет зэрэзэшIуихыгъэр ыкIи ащ фэдэ тхыгъэхэм лъэпкъым икъэухъумэнкIэ мэхьанэшхо зэряIэр игущыIэ къыщыхигъэщыгъ ГУАРИ м ипащэу ЛIыIужъу Адам. Ащ ыуж тхылъым къытегущыIагъэх ыкIи осэшхо къыфашIыгъ шIэныгъэлэжьхэм. Къуаджэу Гъобэкъуае щыщ лъэпкъ IорIотэ орэдыIо купэу «ЛАЩЫН» орэдхэр къыIуагъэх, лъэпкъ драматическэ театрэу «ГУНЭС» къэгъэлъэгъонхэр къышIыгъэх. Ащ ипэгъокIэу щытхъу тхылъхэр институтым афигъэшъошагъэх. Iэнэ хъураем хэлэжьагъэхэр зытет сурэтыр Iофтхьабзэм кIэух дахэ фэхъугъ.