БлэкIыгъэ бэрэскэшхом къуаджэу Нэтыхъуае дэт лъэпкъ творчествэм и Унэ цIыфыбэ щызэIукI... — 6 июля 2026 г. в 09:05:11.815
БлэкIыгъэ бэрэскэшхом къуаджэу Нэтыхъуае дэт лъэпкъ творчествэм и Унэ цIыфыбэ щызэIукIагъ. «ЩымыIэжьым ыцIэ къепIомэ ыцIэ къыпыогъэкIэжьы» зыфиIорэ Iэнэ хъураеу, усакIоу тхакIоу, кIэлэегъаджэу, журналистэу, IорIотэугъоякIоу Меркицкэ Рэщыдэ фэгъэхьыгъагъэр, ащ ушъхьагъу фэхъугъ. Iофтхьэбзэ дахэу, Тэхъутэмыкъое районым культурэмкIэ игъэIорышIапIэ, Гуманитар ушэтынхэмкIэ адыгэ республикэ институтэу КIэрэщэ Тембот ыцIэкIэ щытым, лъэпкъ творчествэм иунэу «Натухай» зэхащагъэм еблэгъагъэх Адыгеим ыкIи Къэбэртэе-Бэлкъарым ишIэныгъэлэжьхэр, Тэхъутэмыкъое районым гъэсэныгъэмкIэ ыкIи культурэмкIэ ягъэIорышIапIэхэм яIофышIэхэр, къоджэдэсхэр, республикэм икъэбарлъыгъэIэс амалхэм, лъэпкъ тхылъыеджапIэм яIофышIэхэр, тхакIохэр, Меркицкэ Рэщыдэ иIахьыл-благъэхэр. Меркицкэ Рэщыдэ ищыIэныгъэ ыкIи итворческэ гъогу зэIукIагъэхэм агу къагъэкIыжьыгъ, адыгэ лъэпкъ культурэм кIэн дахэ къызэрэфигъэнагъэр къыкIагъэтхъыгъ, ыугъоигъэхэм ыкIи ытхыгъэхэм осэшхо къыфашIыгъ. КIэухым лIакъом иуни хьакIэхэр еблэгъагъэх.