Гуманитарнэ шIэныгъэмрэ щыIэныгъэмрэ язэпхыныгъэ аужырэ илъэсхэм мымакIэу шIэныгъэлэжьх... — 13 июля 2026 г. в 08:45:05.351
Гуманитарнэ шIэныгъэмрэ щыIэныгъэмрэ язэпхыныгъэ аужырэ илъэсхэм мымакIэу шIэныгъэлэжьхэр егъэгумэкIых. ШIэныгъэ пэпчъ ипшъэрылъ шъхьаIэу бэмэ алъытэрэр цIыфым ипсэукIэ нахьышIу шIыгъэныр ары. Ащ къыпкъырыкIызэ бэмэ гуманитар шIэныгъэхэм «ятIонэрэ» чIыпIэр «фагъэшъуашэ». Ау мыщ дэжьым арэущтэу шъхьасынчъэу гуманитар шIэныгъэхэм «арычъэхэрэм» ащыгъупшэрэр зы: шIэныгъэм (наукэм) цIыфым ищыIакIэ къодыеп, ежь цIыфыри нахьышIу ышIыныр ипшъэрылъ, цIыфым ицIыфышъхьэ къызэтыригъэнэным фэIорышIэ. Лъэпкъ шIэныгъэм тырыгущыIэмэ, лъэпкъым икъэухъумэни дэлажьэ. Тхьаркъуахъо Юныс – адыгэ бзэшIэныгъэлэжь куу, теоретическэ IофшIагъэу иIэр бэ. Ау джы зигугъу къэтшIыщтыр сыдигъокIи осэ ин зиIэщт тхылъ. КъызэрэдэкIыгъэм илъэс тIокI тешIэжьыгъэми, непэрэ мафэм тифэныкъогъэ дэд. Ар ыцIэ къегъэшъыпкъэжьы: «Адыгэмэ язэдэгущыIакI». «Гупшыси псалъэ, зыплъыхьи тIыс», – аIуагъ тижъымэ. «Чатэм пиупкIырэр мэкIыжьы, жэм пиупкIырэр кIыжьырэп». Мыщ фэдэ лъэпкъ щысэхэм арыгъуазэзэ лъэшэу тхылъ гъэшIэгъон къыдигъэкIын ылъэкIыгъ тишIэныгъэлэжь. Хэти ащ нэIуасэ зыфишIымэ къызэрэшъхьапэщтым тицыхьэ телъ.