Балтачта татар теле укытучыларының очрашуы узды — 25 августа 2026 г. в 05:00:16.903
Балтачта татар теле укытучыларының очрашуы узды 24 август көнне Балтач Үзәк китапханәсендә “Милли мәгариф: традицион кыйммәтләр һәм заманча технологиялар” дип исемләнгән татар теле укытучыларының чираттагы конференциясе узды. Очрашуны китапханә директоры Резида Зарипова ачып җибәрде. Ул үзенең чыгышында китапханәнең соңгы вакытта башкарган эшләренә тукталды. Мәгариф идарәсе методисты Сабирова Фидания Тәбрис кызы республика күләмендә һәм район җирлегендә милли мәгариф өлкәсендәге эшчәнлекне анализлап, алдагы елга максат, бурычларны билгеләде. Район методик берләшмә җитәкчесе, Түнтәр мәктәбенең татар теле һәм әдәбияты укытучысы Нәкыйпова Лилия Мөнир кызы методик берләшмәнең узган уку елындагы эшчәнлеге белән таныштырды. Балтач муниципаль районы татар теле укытучылары ассоциациясе җитәкчесе, Балтач урта мәктәбе укытучысы Хәйруллина Гөлнар Илдар кызы республика конференциясендә хәбәр ителгән яңалыкларга күзәтү ясап, алдагы уку елына эш юнәлешләрен билгеләде. “Иң яхшы татар теле һәм әдәбияты укытучысы” Бөтенрәсәй һөнәри бәйгесенең муниципаль һәм зона туры җиңүчесе, йомгаклау этабы финалисты, Балтач гимназиясенең татар теле һәм әдәбияты укытучысы Гыйбадуллина Марина Васильевна “Сөйләм телен үстерүдә коммуникатив технологиянең отышлы алымнары” темасына методик остаханә тәкъдим итте. Нөнәгәр урта мәктәбенең татар теле һәм әдәбияты укытучысы Гыйльфанова Рәзинә Нургаян кызы педагоглар өчен булган грантларда катнашу һәм җиңүләр яулау тәҗрибәсе белән уртаклашты. Киӊәшмә ахырында 2025 нче елда юбилейларын билгеләп үтүче укытучылар тәбрикләнде. Конференциянең иң матур мизгелләренең берсе — “Бирнә сандыгы” йоласының сәхнәләштерелүе булды. Китапханә хезмәткәрләре әзерләгән бу күренеш борынгыдан килгән гореф-гадәтләребезне, гаилә кыйммәтләрен һәм милли мәдәниятебезнең гүзәллеген күрсәтте.