Балтач мәктәбе Белем бәйрәмен өр-яңа булып каршы алды. — 1 сентября 2026 г. в 10:30:03.194
Балтач мәктәбе Белем бәйрәмен өр-яңа булып каршы алды. Балтач урта белем бирү мәктәбендә дә бу бәйрәм аеруча җылы һәм истә калырлык итеп оештырылды. Иртәнге саф һавада тезелгән укучыларның шат йөзләре, беренче сыйныфларның кулларындагы алсу-зәңгәр чәчәк бәйләмнәре, әти-әниләрнең дулкынланулы карашы — барысы да яңа уку елына матур старт турында сөйли. Тантанада котлау сүзләрен мәктәп директоры Гөлчәчәк Гыйләҗева, район башлыгы Рамил Нотфуллин һәм Татарстан Республикасы Сәламәтлек саклау министры урынбасары Фәридә Фатыйх кызы Яркәева җиткерде. Алар балаларга ныклы сәламәтлек, укуларында зур уңышлар теләделәр. Беренчеләргә «Укучы» исемен лаеклы йөртүне, өлкән классларга имтиханнарны уңышлы тапшыруны, ә педагогларга сабырлык юлладылар. Быел Балтач урта мәктәбе зур төзекләндерүдән соң танымаслык булып үзгәрде: ул хәзер заманча, якты һәм бик уңайлы. Төзекләндерү «Авыл территорияләрен комплекслы үстерү» программасы кысаларында башкарылды. Бу көннең күркәм мизгеле — мәктәп ишегалдында үткәрелгән «Беренче кыңгырау» чыңы булды. Нәни куллардагы кыңгырау авазы быелгы уку елының мавыктыргыч дәресләргә, кызыклы очрашуларга бай булачагын искәртте. Шунысы сөенечле: Балтач мәктәбе коллективы традицияләргә тугры калып, белем учагын саклый, ә укучылары олимпиадаларда, спорт ярышларында һәм фәнни конференцияләрдә район данын лаеклы яклый.