Көзнең алтынсу көннәре... Паркларда халык аеруча күп. «Ватан сакчыларына», «Сабантуй», ...
Көзнең алтынсу көннәре... Паркларда халык аеруча күп. «Ватан сакчыларына», «Сабантуй», «Салкын чишмә», «Шушма яр буе», «Балтач», «Үзәк» парклары — әлеге исемнәр инде күпләребезнең яраткан урыннарына әйләнде. Һәркайсыбызның бу матурлыкка үз өлеше кергән. Ләкин матурлык — ул тырыш хезмәт нәтиҗәсе. Көзнең соңгы матур көннәрендә, җәйге сезонга йомгак ясап, паркларга «яңа сулыш» өрер, кышка әзерлек чоры җитте. Бүген бертөркем җитәкчеләр белән бергәләп территорияләрне карап чыктык. Күзгә ташланган кимчелекләрне барладык. Эш җитәрлек: - юлларны төзәтү; - эскәмияләрне, спорт җиһазларын ремонтлау; - янган утларны алыштыру; - агач-куакларны, чәчәклекләрне кышка әзерләү. Болар— кичектергесез хезмәтләр. Атна ахырында җыелып, өмә ясарга килештек. Парклар тагын да ямьләнер дип ышанабыз. Илебездә «Тормыш өчен инфраструктура» милли проекты гамәлгә ашырыла. «Шушма яр буе» паркы белән «Сабантуй» ял паркын тоташтыручы променад та илкүләм милли проект кысаларында төзелде. Киләсе елга да милли проектлар ярдәмендә төзекләндерү,төзелеш эшләре дәвам итәчәк. Хөрмәтле райондашлар! Паркларны әйләнеп чыкканнан соң, сезгә дә мөрәҗәгатем бар. Кемдер паркларны төзекләндерүгә кулыннан килгәнчә өлеш кертә, яшелләндерүдә катнаша, ә кемнәрдер, киресенчә, башкаларга мәшәкать ясый. Паркларның матурлыгына һәм башкарылган хезмәткә хөрмәт белән каравыгызны, тиешсез урыннарга чүп ташламавыгызны һәм вандализм очракларына юл куймавыгызны сорар идем.