Агымдагы атнада, Чепья авылында, өлкәннәр көне кысаларында, волонтерларга теләктәшлек ...
Агымдагы атнада, Чепья авылында, өлкәннәр көне кысаларында, волонтерларга теләктәшлек күрсәтеп уздырылган зур иҗтимагый чара беркемне дә битараф калдырмады. «Үткәннең хәтере – хәзерге заманның көче – безнең киләчәгебез» волонтерлык акциясе – бары тик гади чара гына түгел, ә буыннар арасындагы өзелмәс җепнең, тарихи хәтернең һәм бүгенге көндә иң кирәкле сыйфат – бердәмлекнең ачык чагылышы булды. «Ярдәмнең олысы, кечесе дә, яшь аермасы да юк», — диләр. Бу сүзләр һавада гына эленеп калмый, ә һәркемнең йөрәгендә яклау таба. Илебездә махсус хәрби операция башланганның беренче көннәреннән үк фронттагы егетләребезгә гуманитар ярдәм туплау буенча титаник хезмәт башкаручы волонтерларның саны, исәбе юк. Солдат егетләргә ярдәм йөзеннән, Балтач бистәсендә генә дә, кыска срокларда, әллә ничә волонтерлык төркемнәре оешты. Аларның сафын һәр авылда диярлек барлыкка килгән авылдашлар берләшмәләре, «көмеш» волонтерлар, мәчетләр һәм изге эшкә үз өлешен кертергә теләгән мәктәп укучылары тулыландырды. Ул вакытта берничә кыю йөрәктән башланган хәрәкәтләр тора-бара гаҗәеп көчле ташкынга әверелде. Волонтерларның һәрберсе кулыннан килгәнчә, туган җир җылысын кушып, фронтка ярдәм итүдә үз өлешен кертә. Кемдер коры ашлар, хуш исле үләннәрдән чәйләр тутыра, кемдер солдатларыбызны суыктан сакларлык оекбашлар бәйли. Икенчеләр исә, солдат гомерләрен саклап калырдай маскировкалау челтәрләре үрә. Ә балалар үзләренең саф күңелләреннән чыккан иң җылы, иң эчтәлекле хатларын язалар. Һәрбер хатта – «Исән-сау әйләнеп кайт!» дигән ихлас теләк, өмет һәм сагыну салына. Чепья авылында узган күркәм чарада нәкъ менә шулар – тыл геройлары ассызыкланды. Аларның фидакарь хезмәте, йокысыз төннәре, изге догалары һәм кулларының җылысы мактауга лаек. «Үткәннең хәтере – хәзерге заманның көче – безнең киләчәгебез» – райондашларыбызның сүздән гамәлгә әверелгән шигаре. Җиңү — бары тик алгы сызыкта гына түгел, ә тылда, һәрбер авылда, һәрбер йөрәктә туа. Туган җир җылысын читтәге солдатларына илтеп җиткерүче бу олы йөрәкле кешеләр — безнең бүгенгебезнең чын каһарманнары һәм киләчәгебезнең ышанычлы терәге. #добрыйтатарстан