Чагыым дыңна, күжүр оглум — 31 июля 2026 г. в 01:28:02.905
Чагыым дыңна, күжүр оглум Өскениңни улус безин кайгап ханмас, Өскерлип-ле калган-дыр сен, тенек оглум. Күдер-шыырак дурт-сының хепке сыңмас, Күчү-түрлүг, бедик боттуг апарган сен. Чалыы, тенек халыын үе кончуг-ла ийин Чагыым дыңна, угаап чору күжүр оглум. Адаң чагыын, аваң сөзүн черле утпа, Адың-биле арын-нүүрүң хирге кагба. Төре-аймааң, ызыгууруң тудуп артар, Төрел-чонну углап-баштаар киживис сен. Өгбелерниң арттырып каан өндүр чагыын, Өзүмнерге дамчыдып бээр киживис сен. Эки кыска чүлдү-чүрээң душтуруп кээр, Эге дээре чилиинде киир билчип ап чор. Эжиң кыстың төрелдерин хүндүлеп чор, Эжииң ажык, шайың алыс чылыг турзун. Ажы-төлдүг апарзыңза чалгаа болба. Ажыл-иштен сезинмейн шудургу бол. Ажык-кончаа, халас чүве черле алба, Ажыг дериң харамнанмайн кызып чуртта. Өске чоннар диленип-даа келир болза, Өскен чериң өдек-турлааң өртек түң чок. Өгбе чонуң шак бо черде мөңге удаан, Өндүр ыдык сүлде-сүзүү сенде дамчаан. Эртем-билиг бедииндиве чүткүп чору, Эртенги хүн кандыг боору кым-даа билбес. Улуглардан көрүп билип өөренип чор, Улустардан алганыңны эгидип чор. Чалым-хая тепкииштери бош-даа болур, Чалгыныңны чалынныг от оя чип боор Чалыы, тенек, халыын үе камнаар эвес, Чагыым дыңна, угаап чору күжүр оглум. Аржаан Ооржак