Татар Согыты авылы җәмигъ мәчетендә җәйге курслар. — 19 июля 2026 г. в 09:51:03.540
Татар Согыты авылы җәмигъ мәчетендә җәйге курслар. Быелгы җәйнең берничә атнасы безнең авыл өчен гади вакыт түгел, ә чын мәгънәсендә — күңелләргә нур, йөрәкләргә сафлык бүләк иткән изге сәгатьләр булды. Әйе, шушы кыска гына, ләкин бай эчтәлекле ике сәгатьлек очрашулар ислам лагере формасында узды, һәм алар балалар өчен генә түгел, ә балалар белән бергә без олылар өчен дә чын мәдрәсәгә әйләнде. Биредә һәр сабак гарәп әлифбасының серле авазлары белән башланып, гарәп хәрефләре алар өчен серле бизәккә әверелде, ә Коръән уку осталыгы — иң зур бүләккә.📚 Лагерьнең рухи йөзен, әлбәттә, безнең олы абыстайлар билгеләде. Алар үзләре — элекке укытучылар, тәрбиячеләр. Алар балаларга түбәтәй чигү, тәкә калфак тегү, ә барыннан да әһәмиятлесе — татар ризыкларын әзерләү серләрен өйрәтергә булыштылар. Лагерьга яңа сулыш бирүче көч — безнең авылның үсмерләре һәм яшьләре иде. Алар балалар белән бер үк телдә сөйләштеләр, хәзерге баланың күңелен аңладылар, менә шушы буыннар бәйләнеше лагерьнең иң матур бизәге булды. Без татар традицияләренә аерым тукталдык. Һәр очрашуда балалар милли киемнәрнең нинди зур мәгънә йөртүен белделәр: чигешле кулмәкләр, ак түбәтәйләр, бизәкле яулыклар — алар бәйрәм кебек киенделәр. Ә ризыклар янында сөхбәтләр корылды: һәр ризыкның үз тарихы, үз риваяте бар икәненә шатландылар. Ә хәзер, лагерь тәмамлангач, балаларның күзләрендә янган утны күрү, безнең өчен — иң зур бәя. Алар Коръән укуны өйрәнделәр, намаз уку тәртибен аңладылар, әдәплелекне йөрәкләренә сеңдерделәр. Әмма иң мөһиме — алар үзләренең мөселман икәнлекләре белән тагын да ныграк горурлана башладылар. Лагерьнең төп оештыручысы Ильмира Вәлиева һәр очрашуда балалар белән бергә булды. Аның тырышлыгы, абыстайларның тәҗрибәсе, яшьләрнең дәрте — болар барысы бергә кушылып, лагерьны чын мәгънәсендә якты язга әверелдерде. Мәчетлэребезгә финанс ягыннан ярдәм итүләре өчен бик зур рәхмәт hәм безнен лагерь җитәкчесе Рәфикъ хәзрәт Кадировка🤲 Илмира Вәлиевага, абый-апаларыбызга, олы абыстайларыбызга, яшь ярдәмчеләребезгә зур рәхмәт! Сезнең хезмәт белән безнең динебез, телебез, гореф-гадәтләребез яши, яшәячәк тә. Чуашстан мөфтияте