Батыр муниципаль округының Кызыл Чишмә авылында урнашкан «Сәләт-Батыр» яшьләр үзәгендә ... — 31 июля 2026 г. в 16:25:37.370

Батыр муниципаль округының Кызыл Чишмә авылында урнашкан «Сәләт-Батыр» яшьләр үзәгендә «Җисем» сменасы матур гына эшләп килә. Бу – иҗат юнәлешендәге профильле смена. Ул музыка, бию һәм театр белән кызыксынган балалар өчен оештырыла. Биредә вокал, җыр язу, актерлык, ораторлык, милли һәм заманча бию дәресләре каралган. Шулай ук спорт һәм күңел ачу чаралары да оештырыла. Бүген «Җисем» сменасында «Кызыл Чишмә» сәнгать фестивале үтте. Фестиваль театрлаштырылган мюзикл форматында тәкъдим ителде. Мюзиклның сценаристы, режисеры һәм сәхнәгә куючылары – Җисем сменасы катнашучылары үзләре булды. Фестивальдә Казан шәһәренең «Шәрык» клубы вәкиле Гөлдәния Зиннатова, автор-башкаручы Азат Гимадеев смена катнашучылары белән берлектәге чыгышлары белән катнашты. Фестивальнең шәрәфле кунаклары арасында Батыр муниципаль округының җитәкче вазыйфасын вакытлыча башкаручы Р. Ф. Ямалетдинов, Татарстан Республикасы Рәисенең ярдәмчесе, «Беренчеләр хәрәкәте» җитәкчесе Т. Җ. Сөләйманов, «Сәләт» проектлары җитәкчесе, әдип-галим Җ. Ш. Сөләйманов бар иде. Фестиваль бик дулкынландыргыч һәм матур итеп үтте. Катнашучылар үзләренең талантларын күрсәттеләр, ә кунаклар исә аларга яңа иҗади биеклекләргә омтылырга илһам бирде. «Кызыл Чишмә» фестивале «Җисем» сменасының иң якты вакыйгаларының берсе булып хәтерләрдә калачак.