Чувашия Республикасының Батыр районында "Авыл көне" һәм "Гаилә бәйрәме" үтте. — 8 сентября 2026 г. в 17:06:33.781
Чувашия Республикасының Батыр районында "Авыл көне" һәм "Гаилә бәйрәме" үтте. Чувашия Республикасының Батыр районы Имәнкисәге авылында татар халкының милли традицияләрен, гаилә кыйммәтләрен саклауга һәм үстерүгә юнәлтелгән «Авыл көне» һәм «Татар гаиләсе» бәйрәмнәре үтте. Батыр районы — Чувашиядә иң күп татарлар яши торган төбәкләрнең берсе. Батыр районының татар авылларында (Шыгырдан, Кыр Бикшеге, Татар Согыты, Озын Куак, Кызыл Камыш, Кызыл Чишмә) яшәүчеләр бу көнне бер мәйданга җыелдылар. Бәйрәм барышында авылның актив кешеләрен, күп балалы гаиләләрне, хезмәт алдынгыларын һәм юбилярларны сәхнәдә бүләкләделәр. Сәхнәдә җирле үзешчәннәр белән беррәттән Татарстан эстрадасы артистлары чыгыш ясады, милли уеннар оештырылды, кунаклар гармунга кушылып рәхәтләнеп җырладылар. Бәйрәмдә Россиянең төрле төбәкләреннән кайткан якташлар һәм чит илләрдә яшәүче тамырлары шушы авылдан булган кунаклар да катнашты. «Татар гаиләсе» бәйрәме чараның бизәге булды. Ул гаилә кыйммәтләрен, татар телен, гореф-гадәтләрен һәм буыннар чылбырын саклап калу максатыннан оештырылды. Бәйрәм Чувашия татарлары милли-мәдәни мохтарияте һәм Чувашия Республикасы Диния нәзарәте белән берлектә үткәрелә. Бәйрәмне Фәнил белән Гөлфизә Насыйровлар гаиләсе оештырды. Гөлфизә ханым Канаш шәһәрендә Бөтенроссия Татар гаиләсе фондының бүлеген житәкли.