*Олох суолугар үктэнэр кэммитигэр — сэрэхтээх буолуу*
*Олох суолугар үктэнэр кэммитигэр — сэрэхтээх буолуу* Алтынньы 6 күнүгэр, С.А. Новгородов аатынан орто оскуолаҕа, дириҥ суолталаах, кэскиллээх кэпсэтиилээх күн үүннэ. Бу күн оскуолаҕа «Олох суолугар үктэнэр кэммитигэр — сэрэхтээх буолуу» диэн тиэмэҕэ методическай десант үлэлээтэ. Олох киэҥ аартыгар үктэнээри сылдьар ыччат дьоммутун иитэр-үөрэтэр учууталларга сэрэхтээх буолуу диэн өйдөбүл хайдахтаах курдук улахан суолталааҕын бу тэрээһин өссө төгүл итэҕэттэ. Сэрэхтээх буолуу диэн — куттал суоһаабытын кэннэ куотунуу буолбатах, бу — эрдэттэн сэрэтэр, толкуйдаахтык дьаһанар, олоххо эппиэтинэһи сүгэр үрдүк култуура. Бу күн оскуола 74 педагога оҕо инники олоҕор куттал суоһаабатын туһугар, кинини сэрэтэр, харыстыыр, бигэ тирэхтиир туһугар биир сомоҕо буолан үлэлиир, билиини хаҥатар соруктаах түмүстүлэр. Методическай десант үлэтэ бу сырыыга оҕолорго эрэ буолбакка, кинилэри иитэр-үөрэтэр улахан дьоҥҥо туһаайылынна. Тоҕо диэтэххэ, оҕо сэрэхтээх буоларга төрөппүттэн, учууталтан үөрэнэр. Оттон учуутал бэйэтэ бу тиэмэҕэ дириҥник иҥэн-тоҥон үлэлээтэҕинэ, кини үөрэтэр оҕолоругар бу билиитин иҥэрэрэ ордук тиийимтиэ, ордук күүстээх буолар. Түмүккэ, бу күн мустубут учууталлар биир санааҕа кэллилэр: оҕо олоҕун суола ыраас, сырдык буоллун, оттон кинини арыаллыыр улахан дьон — кинилэр — хас биирдии үөрэнээччигэ сэрэхтээх буолуу өйдөбүлүн хааннарыгар-сүрэхтэригэр иҥэрэн, бигэ дурда-хахха буолан, олох киэҥ аартыгар эрэллээхтик үктэнэллэригэр күүс-көмө буолуохтара.