Чурапчыга Кыайыы күнүгэр аналлаах быыстапка аһылынна
Чурапчыга Кыайыы күнүгэр аналлаах быыстапка аһылынна Бүгүн Чурапчытааҕы Бойобуой Албан аат түмэлигэр «Победный май» быыстапка аһыллыыта буолла. Быйылгы быыстапка Аҕа дойду улуу сэриитин кыттыылаахтарыгар, биир дойдулаахтарбытыгар—Албан аат 3-с, Аҕа дойду улуу сэриитин 1-кы степеннээх уордьаннарын, «Бойобуой үтүөлэрин иһин», «Кенигсберы ылыы иһин», «Германияны кыайыы иһин» бойобуой мэтээллэр кавалердара Иван Михайлович Павлов төрөөбүтэ 105; лейтенант, снайпер, 69-с туспа разведкалыыр рота хамандыыра, «Кыһыл Знамя» уордьан, «Хорсунун иһин» мэтээл кавалердара Егор Дмитриевич Догордуров 110; гвардия сержана, снайпер, икки «Кыһыл сулус», Аҕа дойду сэриитин 2-с степеннээх уордьаннарын, «Хорсунун иһин», «Германияны кыайыы иһин» мэтээллэр кавалердара Георгий Константинович Федоров 110 сылларыгар ананна. Манна сэрии кыттыылаахтарын туһунан хомуллан илиинэн оҥоһуллубут альбомнар, Чурапчыбыт оҕолоро поисковай этэрээккэ сылдьан булбут сэрии саҕанааҕы экспонаттара, нэһилиэктэр стендэлэрэ уо.д.а. турдулар. Маны тэҥэ аныгылыы интерактивнай экранынан эмиэ видеонан, хаартысканан көрдөрөн кэпсиэхтэрэ. Быыстапка аһыллыытыгар улуус баһылыгын солбуйааччыта Мария Кронникова, А.А.Саввин аатынан Чурапчытааҕы история уонна этнография түмэлиэн дириэктэрэ Афанасий Захаров тыл эттилэр, быыстапканы үгүс киһи, чуолаан оҕо, эдэр ыччат, көхтөөхтүк кэлэн көрөллөрүгэр-истэллэригэр баҕа санааларын тиэртилэр. Маны тэҥэ Бойобуой Албан аат түмэлигэр анал байыаннай дьайыыга, эдэр байыастар сырдык ааттарын үйэтитэргэ туһуламмыт анал хос эмиэ үлэлиир. Быыстапка ыам ыйын 9 күнүн киэһэтигэр диэри туруоҕа. Онон улууспут олохтоохторо бука бары кэлэн көрүҥ, сэргээҥ, оҕолоргутугар, сиэннэргитигэр албан ааттаах биир дойдулаахтарбыт туһунан сырдатыҥ диэн ыҥырабыт. Наталья Сибирякова https://xn--80aa7aggbp2b.xn--p1ai/churapchyga-kyajyy-k%d2%afn%d2%afger-anallaah-byystapka-a%d2%bbylynna/