«АНДРОСОВ FEST» БЭСТИБЭЭЛ СИТИҺИИЛЭХТИК ААСТА — 8 августа 2026 г. в 04:32:27.005
«АНДРОСОВ FEST» БЭСТИБЭЭЛ СИТИҺИИЛЭХТИК ААСТА Атырдьах ыйын 7 күнүгэр Майа сэлиэнньэтигэр биллиилээх, киэн туттар биир дойдулаахпыт, Саха Өрөспүүбүлүкэтин култууратын үтүөлээх үлэһитэ, талааннаах мелодист, быраас Виталий Тимофеевич Андросов төрөөбүтэ 75 сылыгар анаммыт «Андросов FEST» бэстибээл үрдүк таһымнаах, элбэх ыҥырыылаах ыалдьыттардаах буолан ааста. Бэстибээлгэ Виталий Тимофеевич аатын үйэтитэр уонна кини айымньыларын, үлэтин сырдатар тэрээһиннэр ыытылыннылар. Ол курдук М.К. Попова аатынан оҕо ускуустубатын оскуолатын баян кылааһыгар кини аата иҥэрилиннэ, кыраайы үөрэтэр түмэлгэ "Талба талаан маанылааҕа" диэн быыстапка үөрүүлээх быһыыга-майгыга арылынна. Күн иккис аҥаарыгар «Комсомольскай болуоссакка» киэҥ хабааннаах норуот күүлэйэ тэриллэн, атыы-эргиэн, оҕолорго остуол оонньуулара, Саха Өрөспүүбүлүкэтин Ил Түмэнин дьокутааттарын көрсүһүүлэрэ ыытылыннылар. «Мэҥэ Уус» уран тарбахтаахтарын быыстапка дьаарбаҥката тэриллэн, аһаҕас халлаан анныгар маастар-кылаастар дьон-сэргэ болҕомтотун тартылар. Д.Ф. Ходулов аатынан Майа сэлиэнньэтин норуот айымньытын дьиэтигэр Сахабыт сирин эстрадатын ырыаһыттара уонна улууспут талааннаахтара кыттыылаах «Алааһым арылы кустуга» улахан быраһынньыктааҕы кэнсиэр бэстибээли түмүктээтэ. «Андросов FEST» Виталий Тимофеевич Андросов сырдык аатын үйэтитиигэ, кини баай ис хоһоонноох олоҕун тарҕатыыга уонна Сахабыт сирин култууратын сайдыытыгар улахан кылааты киллэрдэ. Мэҥэ Хаҥалас улууһун дьаһалтатын пресс-сулууспата