Кочкизь тиринь келень сехте вадря тонавтыцянть🌿🌿🌿
Кочкизь тиринь келень сехте вадря тонавтыцянть🌿🌿🌿 Саранскоень 26 № лицейсэ ютась «Тиринь келень ды литературань сехте вадря тонавтыця – 2026» Весероссиянь пелькстамонь региональной этапонь финалось. Тей пурнавсть сетне, кить тонавтыть эйкакштнень эрзянь ды мокшонь келентень, литературантень, минек культурантень. Конкурсось мольсь зярыя пельксстэ. Заочной этапсонть тонавтыцятне невтизь медиавизиткаст ды уроконь видеозаписест. Очной пелькссэнть педагогтне ютавтсть панжадо мастер-класст ды лия мельстуиця вастовомат. Финалс лиссть сетне, кить эсест районсо кармасть сехте виевекс. Тонавтыцятнень ютксо неть: Кирилл Шишканов (Саранск ош), Вера Цыбисова (Сыре Шайговань районось), Наталия Солдаткина (Кочкурбуесь), Надежда Сигимова (Отяжбуесь) ды Нина Алексина (Чаунзабуесь). Эйдень кужонь воспитательтнень ютксо: Екатерина Бурнаева (Саранск ош), Елена Шишканова (Сыре Шайговань районось), Надежда Чугунова (Рузаевкань районось), Юлия Ермошкина (Дубенкань районось) ды Татьяна Демкина (Инсаронь районось). Изницякс яволявтозель Саранскоень 5 № школань мокшонь келень тонавтыцясь Кирилл Шишканов. Сон важоди ансяк колмо иеть. Тонавтомасо тевс нолды неень шкань технологиятнень – искусственной интеллектэнть. – ИИ-сь лезды «вельмевтемс» эрзянь ды мокшонь фольклоронь персонажтнень. Тейнетяно роликть, косо Мордовиянь содавикс ломантне сынсь евтнить эсь прядост уроксонок. Те лезды парсте чарькодемс информациянть, кармавты кунсоломс, эйдетне седеяк явить мель келень тонавтнемантень, – пачтясь изницясь. Воспитателень номинациясонть, косо тевс нолдыть этнокультурной енксонть, изницякс кармась Саранскоень 85 № эйдень кужонь воспитателесь Екатерина Бурнаева. Сонгак од специалист, роботы колмоце ие. Ней минек педагогтне кармить анокстамо пелькстамонь федеральной этапов. Сентябрясто Кирилл Шишканов ды Екатерина Бурнаева молить Липецк ошов, тосо ютавтови «Тиринь келень ды литературань сехте вадря тонавтыця» конкурсонь меельце этапось. Арсетяно тенст ансяк изнямо!