СВО-нь участниктнень семиятне якасть иневанькс таркав
СВО-нь участниктнень семиятне якасть иневанькс таркав МР-нь Экономикань, торговлянь ды предпринимательствань министерствась, «Единая Россия» партиянь авань движениясь ды Отечествань воинтнэнь семиятнень комитетэсь анокстасть СВО-нь участниктнень семияст туртов пек паро экскурсия. Сынь якасть исторической ды паро таркав – Старцев Уголов. Сон ашти Мордовиянь Покш Игнатбуенть ды Нижегородской областенть марто границясо. Кезэрень шкане тосо ульнесь Спасо-Преображенской пустынь. Старцев Уголсо чавить зярыя лисьмапрят, ютксост святитель Спиридон Тримифунтскиень ды Николай Чудотворецэнь лемсэ. Ведесь лезэнь кандыця, лециця, эрьва лисьмапрясонть веденть танстезэ лия, эрьванть эсензэ историязо ды легендазо. Инжетне теевсть содавиксэкс Андрей монахонть марто, сон – спецоперациянь участник, стакасто ранязель. Весе стакачитнень печтямодо мейле кочкизе Пазонтень служамонть. – Масторонок лангсо улить таркат, конат, лангс ваномс, мейсэяк а явовить, ансяк ломантне свал тов ардыть. Старцев Уголось – самай истямо тарка. Тесэ лия коштось, тесэ паролгады ежот, пурнат оймевийть. Миненек служасть чавовозь воинтнэнь ледстнемга панихида. Мейле якинек ниле лисьмапряс, тенек ютавтсть экскурсия, евтнесть ламо мельстуиця тевть. Седе тов тердимизь трапезав, андымизь седе, мезе сынсь кастыть. Туинек тосто шожда ойме марто, мельсэнек ульнесь бажамо тагояк понгомс те таркантень. Сюкпря весенень, кить пурнызь те экскурсиянть, – пачтясь Ицялбуень Отечествань воинтнэнь семиятнень комитетэнь прявтось Татьяна Зеленеева. Те ардомась кармась аволь ансяк иневанькс таркава экскурсиякс, СВО-нь геройтнень аваст ды нист озность малавиксэст кисэ, мусть седеень эждиця валт, кортнесть сетнень марто, кить истя жо печтить ризнэма ды мелявкс.