Вера Кочурина – эсь тевсэнзэ сехте вадря!
Вера Кочурина – эсь тевсэнзэ сехте вадря! Июльстэ Мордовиясо кармить ютамо «Лучший по профессии» профессиональной мастерствань Весероссиянь пелькстамонь федеральной этаптне. Сонзэ участникекс кармить «Ветеринарный фельдшер», «Агроном», «Технолог пищевой промышленности в сфере сыроварения» номинациятнесэ региональной этапонь изницятне. Те пелькстамонть ютавтыть Россиянь Трудонь ды социальной ванстомань министерствась, федеральной ды региононь властень органтнэ, профсоюзонь общероссийской вейсэндявкстнэ. Мордовиясо ушодовсть конкурсонь региональной этаптне. Васенцекс пелькстасть ветеринарной фельдшертнэ. Мельгаст – 11 агрономтне. Агрономтнень ютксо профессиональной пелькстамонь программась аштесь кавто пельксстэ: теоретической (тестт) ды практической. Практической пельксэнть участниктне теизь Мордовиянь велень хозяйствань НИИ-нь паксятнесэ. Те – эрьва кодамо культуратнень видемаст коряс робота, касовкстнэнь ванномась ды лия мезе. Весе пелькстамотнеде мейле, конкурсонь региональной этапонь изницякс жюрись яволявтызе Отяжбуень «Сабанчеевское» велень хозяйствань предприятиянь прявт агрономонть Вера Кочуринань. Самай сон карми невтеме Мордовиянть федеральной этапсо «Агроном» номинациясо. Конкурсонь федеральной этапонь изницятнень каземе кармить Московсо Кремлевской Покш дворецсэ. Васенце тарканть кисэ максыть премия 1 млн целковоень покшолмасо, омбоце тарканть кисэ – 500 тежат целковойть, колмоценть – 300 тежат целковойть. Арсетяно ансяк изнямс!