Гуманитарной лезкс
Гуманитарной лезкс Саранскойсэ «Ресурсный центр добровольчества Республики Мордовия» АНО-сь вейсэ «Центр развития общественных инициатив» АНО-нть марто СВО-нь участниктнень, ветерантнэнь ды сынст семиятнень туртов анокстасть гуманитарной лезксэнь пурнамонть коряс акция. Россиянь чинтень алтазь акциясонть ульнесть волонтерт ды аволь коммерческой организациянь прявтт. Штабов кандозь весе ули-парось ды ярсамопельтне кучовить #МЫВМЕСТЕ программанть коряс. «Минь пурнынек удома таркань комплектт, гигиенань кедьенкст, оршамопельть, эрявикс инвентарь, истя жо седе кувать ванстовиця ярсамопельть», – евтнесть акциянь ютавтыцятне. Поладсынек, Мордовиянь доброволецтнэ явить мель аволь ансяк военнослужащейтненень ды сынст семиятненень лездамонтень: «Минь истя жо лездатано Дагестанонть ды Туапсе ошонть туртов ярмактнень пурнамонть коряс, кучнинек удомань комплектт госпитальс, ардтнетяно гуманитарной миссия марто. Аволь умок минек делегациясь сась Курской областьстэ».