Кода Орданьбуень Баеньбуесэ анокстыть позань салведь🥣🥣🥣
Кода Орданьбуень Баеньбуесэ анокстыть позань салведь🥣🥣🥣 Орданьбуень Баеньбуесь – кезэрень веле, конасонть течинь чис ванстови эрзянь келесь, культурась ды койтне-кирдатне. Эрьва покш чинтень тесэнь эрицятне пидить-панить истямо ярсамопель, конась ванстовсь ансяк те велесэнть. Кизэнь самонть ды пиресэ васень эмежтнень касоманть марто анокстыть позань салведь. Велень эрицясь Клавдия Михайловна Паксяйкина чачсь-кассь теске, Баеньбуесэ. Ледстни, кода икелень шкане эрзянь аватне эрьва чистэ панильть каштомсо кши, пидильть ям, каша. Ней жо аламо кинь ванстовсь каштомось, велесэ эриця од ломантне бажить шождалгавтомс эсь эрямонть. Каштомось жо – те шка, мелявкс ды стакачитькак. Тень лангс апак вано, Клавдия Михайловна вечки котьмамо каштом икеле. А кодамо тантей тосо пидезь ярсамопелесь! Эсь 71 иесэнзэ авась эрьва оймсема чи пани прякат, кши. А прявт ярсамопелесь, конась сонзэ лиси сехте парсте ды тантейстэ – те каштотсо коптязь тувонь салась. Аванть улить эсензэ позань салведень анокстамонь салавачинзэяк, конатнень панжинзе миненекак. Позань салведенть анокстамга сон саи покш вакан, васняяк керси пиже чурькат. Танстень кис сынст мерькасынзе чувтонь томбамосо. Истя, чурькась макссы весе танстенть. Тень тееме тонавтокшнызе сырькаезэ. Седе тов пиди модамарть, кудонь алт. Керси колбаса ды пиже куярт. Мельцекс каи копер ды петрушка, тень весе салтсазо ды валсазо позасо, конанть кудазоравась теи сонсь. Рецэптэсь истя жо ванстовсь покштятнень-бабатнень пельде. Седе тов весементь човорясы, каи велькс ды вана ярсамапелесь анок. – Монь салведенть пек вечксызь эйкакшон ды нуцькан. А содан, кода эйсэнзэ анокстыть минек велень лия кудазораватне, монь жо сырькаем ды авам тонавтокшнымизь истя. Бажан ванстомс сынст коест-кирдаст. Эсень нуцькатненьгак тонавтан теке рецэптэнть коряс анокстамо. Тантей салведень салавачись аволь сеньсэ, мезе эйзэнзэ каят, прявтось – паро ежось ды чамасо мизолксось. Бути истя карми, сестэ куш мезесь лиси мельстуиця, – кемексты Клавдия Михайловна. Яна Кудашкина Фотосонть: Клавдия Михайловна Алёна нуцьканзо марто