«Вайгелень максомга» кучинзе 1млн 510 тежат целковоензэ
«Вайгелень максомга» кучинзе 1млн 510 тежат целковоензэ Саранск ошка Россиянь УМВД-нь 3 № ОП-нь дежурной частев пшкадсь 64 иесэ пенсионеркась, конась пачтясь 1 миллион 510 тежат целковоензэ манямодо. Зыянс понгозенть валонзо коряс, мессенджерс сонензэ сась пачтямо «кудонь чат» профиленть пельде, конасонть сермадозель максомс вайгеленть кудост перька тарканть витнемга. Тень туртов эрявсь тешкстамс смс-пачтямостонть кодонть. Теде мейле тензэ сеске сась «Госуслуги» логотипенть марто пачтямо, келя, кие-бути совась сонзэ страницантень. Тандадозь, авась гайневтсь смс-нть вельде пачтязь телефононь номерганть. Каршонзо кортыця асодавикс ломанесь, конась яволявтызе прянзо «Госуслуги» порталонь сотрудникекс, мерсь, келя, пенсионерканть данноензэ понгсть мошенниктненень. Теде мейле кортамось уш тусь буто Минцифрань ды Федеральной казначействань важодиця марто. Аферисттнэ яволявтсть, келя аванть лемс сермадстозь доверенность, ды кевкстизь – улить-арасть банксо путозь ярмаконзо? Авась эзинзе сепо тосо ванстовиця вейке миллион целковоензэ. Мошенниктне пачтясть пенсионеркантень, келя, шкань апак таргсе казначействасо панжома ячейка ды тов путомат ярмактнень. Зыянов тевень теицятнень кунсолозь, авась банксто саинзе ярмаконзо ды банкомат вельде мошенниктненень кучинзе 1 миллион 10 тежат целковойтнень. Теде мейле авантень таго мерсть, келя, сонзэ лемс саезь кредит, секс ячейканть панжомс эзь саво. Процедуранть прядомга авантень мерсть шкань апак таргсе пандомс кредитэнть. Зыянс понгозесь кандынзе ломбардов сырнень мазылгавтомапелензэ, содавиксэнзэ кедьга пурнынзе а сатныця ярмактнень ды таго кучинзе 500 целковойтнень аферисттнэнень. Весе кармавтоматнень топавтозь, мошенниктнень пельде гайневтнематне лоткасть сакшномодо. Чарькодезь, понгсь азарсь ломантнень манчемантень, авась пшкадсь полицияв. Мордовия Республикава МВД-сь ледстни: - Зярдояк илядо ютавто ярмакт асодавикстнэнень, конат истя жо алтыть лездамс велявтомс салазь ярмактнень. - Алкуксонь юристтнэ а вешнить клиентт спам-рекламанть вельде седе мейле, кода сынь кармасть манчемань жертвакс. - Тынк жо ярмактнень ливтемаст туртов налогтнень эли комиссиянть пандомань куш кодат вешематне аштить манчемань тешксэкс. Бути тынь вастовиде истямо тев марто, сеске сезинк весе сюлмотнень ды пшкадеде полицияв.