«Апелемачинь урок»
«Апелемачинь урок» Мордовия Республикава «Защитники Отечества» Госфондонь филиалонть ушодксонзо коряс неть читнестэ Саранскоень 3 № школасо ютавтозель «Апелемачинь урок». Тонавтницятненень инжекс сакшнось специальной военной операциянь ветеранось, те школанть прядыцясь Александр Егоров. Александр Егоров 3 № школанть прядызе 1995 иестэ, теде мейле максовсь тензэ инженерэнь образованиясь ды важодсь республикань теплоэнергетической комплекссэ. 2025 иестэ сась мельс «Ахмат» спецназонтень совазь туемс фронтов, служась Курскоень енкссо радиоэлектронной борьбань специалистэкс. Апелемачинь невтеманть ды профессионализманть кис ветеранось казевсь «Участнику спецоперации» медальсэ ды ведомственной наградасо. Школасо тонавтницятнень марто вастовомасонть Александр Егоров ледстнесь эсь службадонть, невтнесь фронтонь фотографият ды макснесь каршо валт эйкакштнень кевкстемаст лангс. Сон евтнесь мелезэнзэ сехте пек кадовозь тевденть ды кодамо ванстомапель (оберег) кандтнесь мартонзо фронтсо улемань перть. – Ледстнемапелекс монень кармасть ятонь, конась штурмовизе минек блиндажонть, чаво гильзатне. Сестэ вейке минек боецэсь маштовкшнось, омбоцесь стакасто ранявкшнось. Мон сынст пурнынь, штобу зярдояк а стувтомс, кодамо питне максови сэтьме менеленть кис, – ризнэзь тешкстась СВО-нь ветеранось. Александр Егоровонь школасо ютавтозь шкадонзо тонавтницятненень евтнесь классонь икелень ветиезэ Светлана Кузнецова. Сон тешкстась, келя, Александр ульнесь сэтьмекс, кунсолыцякс. Тонавтнесь «нилес» ды «ветес» ды свал аноколь самс лездамо оянстэнь. Педагогось истя жо невтнесь архивстэ фотот, конатнесэ ветеранось снимазь вейке классо тонавтницятнень марто.