Этнографической диктантонть ютавтомадо
Этнографической диктантонть ютавтомадо Неть читнестэ МР-нь Пресс-центрасо региононь журналисттнэнень евтнезель Мордовиясо Этнографической покш диктантонть ютавтомадо. Вастовомантень сакшность МР-нь Культурань, раськень политикань ды архивень тевень министерствань ды Равчирень финнэнь-угрань раськетнень культурань центрань представительтне. «Большой этнографический диктант» раськеютконь просветительской акциясь тедеде ютавтови Россиянь Раськетнень вейсэндявомань иенть лувсо. Проектэсь содавты минек масторсо эриця раськетнень культуранть марто, истя жо лезды ванномс этнокультурной содамочитнень. Весе Россиянть келес ды омбо мастортнэсэ участниктне кармить максомо каршо валт диктантонь кевкстематнень лангс ноябрянь 3–12-це читнестэ. «Мордовиясо просветительской акциясь ютавтови ноябрянь 5-це чистэ. Мелят 10-це юбилейной диктантось кармась сехте сюпавокс участниктнень ламочист коряс. Весемезэ тосо ульнесть малав ниле миллионт ломанть Российской Федерациянь 89 субъекттнэстэ ды омбо масторонь 178 мастортнэстэ. Минек республикасо диктантонь участникекс 2025 иестэ ульнесть малав 18 тежат эрицят», – пачтясь Мордовия Республикань культурань, раськень политикань ды архивень тевень министрань полавтыцянь тевтнень нурька шкас топавтыцясь Александр Кочеваткин. Диктантонь ютавтома таркатнеде ды сонзэ башка енкстнэде домкасто евтнесь Равчирень финнэнь-угрань раськетнень культурань центрань исполнительной директорось Анастасия Бакулина: – Тедеде минек республикасо кармить важодеме кода диктантонь очной сермадомань площадкат, истя жо онлайн-форматсо. Мирэтно.рф интернет-порталсонть мереви ваномс масторонь келес диктантонь ютавтомань весе площадкатнеде, истя жо Мордовиясо. Теке порталсонть мереви сермадомс диктант онлайн-лувсо. Те иень диктантсонть ламолгавтозь видеокевкстематне – эйстэст кармить кемень. Сынст макссызь специальной военной операциянь участниктне, Россиянь раськетнень представительтне. Истят кевкстематне вельмевтить диктантонть ды максыть башка чарькодема минек масторонь раськетнень культурадост. 2026 иестэ просветительской акциясонть примить участия Мордовиянь муниципальной весе районтнэ. Неень шкантень республикасонть кемекстазь 65 площадкат, косо участниктне кармить сермадомо диктант те эли тона лувсонть. Те: образованиянь, культурань учреждениятне, административной органтнэ. Анокстыцятне кемить, акциянтень вейсэндявить промышленной покш предприятиятнеяк. Мордовиясо этнографиянь покш диктантонь очна сермадоманть туртов анокставить лиятнень енов а молиця площадкат. – Васенце площадкась карми важодеме Саранскойсэ А.С. Пушкин лемсэ Национальной библиотекасо. Тесэ диктантось ушодови 12 чассто. Истя жо минек кармить лиятнень енов а молиця муниципальной кавто площадкат, конатне тедеде васенцеде ютавтыть этнографиянь покш диктант. Рузаевкань районсо истямо площадка тееви Ухтомскиень лемсэ культурань центрасонть. Покш Игнатовань районсо – райононь центральной библиотеканть юрсо. Истят площадкатнесэ акциянь анокстыцятненень мереви ютавтомс башка мероприятият-выставкат, концертт ды истя седе тов. Лиятнень енов а молиця эште вейке площадкась – Мордовиянь государственной университетэсь. Сон карми важодеме тонавтыцятнень ды студенттнэнь туртов, – тешкстась Анастасия Бакулина. Этнографиянь покш диктантонь участникекс мереви улемс Российской Федерациянь ды омбо масторонь эрицятненень, иетнень, образованиянть, социальной принадлежностенть, национальностенть, Пазнэнь кемеманть ды гражданстванть лангс апак вано. –16 иес участниктнень туртов диктантонь заданиятне – 20 общефедеральной кевкстемат, 16 иеде седе сыретнень туртов – 30 общефедеральной кевкстемат. Сехте ламо баллтнэ, конатнень мереви пурнамс – 100. Диктантонть топавтомс максовить 45 минутат. Тедеде эрьва участникентень максови кевкстема марто вейке бланк, козо нь истя жо тешкстави сертификатонь получамодо мелесь», – евтнесь Равчирень финнэнь-угрань раськетнень культурань центрань информационно-аналитической ды методической тевтеемань отделэнь прявтось Татьяна Моталина.