«Эрзянь лисьмапря»
«Эрзянь лисьмапря» Вана уш кемготовоцеде Нижегородской областень Лукояновань округсо ютавтовсь «Эрзянь лисьмапря» регионъютконь фестивалесь. Тедеде сон алтазель Россиянь раськетнень вейсэндявомань иентень. Васня сонзэ ютавтнесть «Кельмелисьмалеень лисьмапрянть» вакссо этнопарксонть, конась ашти Новоселки велесэ. Неенсесь мольсь Лукоянов ошонь культурной развитиянь центрасо. А.С. Пушкин лемсэ ловнома кудонь раськень ды краеведениянь литературань куронь важодицятне истя жо примасть участия «Эрзянь лисьмапря» регионъютконь фестивальсэнть. Библиотекань важодицятне «Ламзурь» раськень фольклорно-этнографической ансамблянть марто вейсэ ульнесть покш чинь торжественной прологсо, конасонть невтевсть эрзянь раськень кезэрень койтне-кирдатне. Мероприятиянть содавтызь Нижегородской, Саратовской областтнень, Мордовия Республикань общественной организациятнень представительтне. – А муеви лия истямо мазый тарка, конань ведензэ эрицятне ловить дивань тевекс ды косо путозь чувтонь ламо скульптурат, конатне теезь эрзянь культурань ванстоманть ды виевгавтоманть коряс ламо ушодкстнэнень лездыцянть Николай Иванович Аношкинэнь ды сонзэ церанзо Николай Николаевичень кедьсэ. Фестивалесь дивавтсь эсь покш чисэнзэ. Эрьва кодамо регионсто тей пурнавкшность аволь ансяк артистт ды шкинемань коллективть, штобу невтемс морамонь ды хореографиянь ерокчист, истя жо ломанть, конат явить мель раськень койтненень-кирдатненень, – тешкстась «Ламзурь» ансамблянь ветицясь Р.Б. Щанкина. Истят вастовоматне вейсэндить ломантнень, лездыть ванстомс койтнень-кирдатнень, кемекстамс раськетнень ютксо ояксчинть ды кастомс од ломантнесэ эсь ундокстнэнень мелень явоманть. Яна Зеткина