Учотано эрзянь-мокшонь раськень оршамопелень электронной каталог
Учотано эрзянь-мокшонь раськень оршамопелень электронной каталог Меельце шкасто Мордовиясо арсевить ды топавтовить ламо проектт, конатнень лувсо виевгавтовить эрзянь-мокшонь раськень культурась, келесь ды койтне-кирдатне. С. Д. Эрьзя лемсэ изобразительной искусствань музейсэ ютась прессанть марто вастовома, конась алтавсь «Мордовский костюм как культурный текст» проектэнтень. Сон топавтови Культурань инициативатнень РФ-нь Президентэнь фондонь грантонть вельде. Прявт смустесь – эрзятнень ды мокшотнень музейсэ ванстовиця коень оршамопелень панжадо электронной каталогонь теемась. Проектэсь лезды ванстомс эрзятнень ды мокшотнень материальной сюпавчинть неень шкань цифровой форматсо. Музеень важодицятненень, исследовательтненень, художественной сообществантень ды общественностентень максови возможность музеень фондтнэсэ ванстовиця экспонаттнэнь неемс онлайн. Оцифровканть туртов кочказь панарт, пулайть, човалясто мазыльмат, пряс путомат ды эрьва кодамо каркст. Те весемесь пурназель научно-исследовательской экспедициятнень шкасто. – Минек бажамонок – евтнемс раськень питнейчиденть неень шкань технологиятнень вельде. Нама, минь содатано, музейсэ весе ванстовицятне а невтевить, эдь эйстэдест пек ламо. Теде башка, каталогсонть истя жо невтеви музеень сотрудниктнень ламо иень перть важодемаст. Коллекциянть пурнамга эрявсь ютавтомс ламо экспедицият, конатнень пингстэ аламонь-аламонь пурнавиль материалось. Меельце иетнестэ дизайнертнэ ды артыцятне топавтыть моделированиянь тевенть, ливтить лангс, кодамокс ульнесь оршамось ютазь пингетнестэ, – тешксты Наталья Челмакина, декоративно-прикладной искусствань отделэнь прявтось. Электронной каталогось – те аволь ансяк цифровой витрина, истя жо ламо функциянь исследовательской инструмент. Фильтратнень вельде сон лезды кочкамс экспонаттнэнь максозь параметратнень коряс ды сеске неемс эрявикс информациянть. Музеень экспозициянть коряс, цифровой форматось максы возможность неемс сехте вишкине детальтненьгак: кодазь коцтонь фактуранть, викшневксэнь ды човалянь мазылгавтомапельтнень башка енксост. Раськень оршамопельсэ ней а яксить. Секс сынст эрявить ванстомс музейсэ, штобу мельганок эрицятне содавольть эйстэдест ды эсь сельмесэ неевлизь сынст мазычист. Тешкстама, проекттэнть башка топавтови эштеяк покш важодема. Дизайнертнэ, модельертнэ ды декоративно-прикладной искусствань мастертнэ течи одс арсить этнической мотивтнень. Проектэсь вадрясто невти эпохань те диалогонть: башка блоксо каталогсонть максовить музеень фондтнэстэ авторской произведениятне. Неть важодевкстнэ кемевтить, эрзянь ды мокшонь оршамопелень койтне виевгадыть. Мероприятиянть лувсо анокстазель «Мордовский костюм: традиция, контекст, новые смыслы» экспресс-выставкась, косо невтевсть чуросто вастневиця экспонатт, конат ванстовить запасниктнесэ, ды сынст ули исторической ды художественной покш питнейчист. Яна Зеткина