Моли «Культура для СВОих» акциясь
Моли «Культура для СВОих» акциясь Мордовиянь музейтнесэ, театратнесэ, библиотекатнесэ, клубтнесэ важодицятне уш аволь вейке ие явить мель СВО-нь боецтнэнень гуманитарной сталмонь пурнамонтень, тейнить алтымат, ортопедической изделият ды ламо лия тевть. Ней жо республикань учреждениятнень коллективтне евтасть мель ютавтомс «Культура для СВОих» лементь ало благотворительной акция. Августонть ды сентябрянть перть невтевить концертт, спектаклят, кинот, лекцият ды творческой мастер-класст. Акциянть лувсо пурназь весе ярмактне кучовить специальной военной операциясонть улезтненень лездамга. «Культура для СВОих» акциянь программантень истя жо совавтозь Рузонь ды Национальной драмтеатратнень путовкстнэ, И.М. Яушев лемсэ оперань ды балетэнь театрань невтевкстнэ. Теде евтнесь МР-нь культурань, национальной политикань ды архивень тевень министрась Светлана Баулина. Саранскоень «Россия» кинотеатрась уш ютавты сеанст. А вана РДК-нь кудось неень шкасто пекстазь, тосо топавтовить витнемань тевть, секс госфилармониянь артисттнэ благотворительной концерт невтить Рузонь драмань театрань сценанть лангсо. «Культура для СВОих» благотворительной акциянть лувсо истя жо ютавтовить экскурсият ды квестт, конатне сюлмавозь тиринь масторонть историянзо, ине флотоводецэнть Федор Ушаковонь уцясканзо ды Степан Эрьзянь творчестванзо марто.