Истят минек од ломантне
Истят минек од ломантне Мария Материкинанень 16 иеть, сон – Саранскоень Ф.В. Сычков лемсэ художественной училищань студентка, тонавтни «дизайн» енкссонть, прядсь омбоце курс. Теде икеле прядынзе Саранскоень 27-це ды 2-це № художественной школатнень. 11 иесэ уш тейтерьканть чачсь мелезэ варчамс прянзо шкинемасо. Ды вана ушодсь тонавтнеме 2-це № художественной школасо. – Монь туртов те а шожда тевсэнть лездась училищань станковой ды декоративной композициянь коряс тонавтыцясь Галина Владимировна Сабитова. Сон ульнесь эсь тевензэ содыцякс, истя жо пек чевте седей ды мелень ваныця ломанекс. Мон свал бажинь улемс сонзэ кондямокс. Галина Владимировна аламонь-аламонь кармась тонавтомон шкинемань салавачитнес. Нама, шкань-шкань а шождаль, ялатеке эрьва чистэ, содамочитнень паморькскень паморькс кочказь, эйсэнь кармась чачомо вий ды эсь прянтень кемема, – корты Маша. Ракшат, церьковат, омбо масторонь евкссто саезь тейтерть. Кото иетнень перть Машань пурнавсть эрьва кодамо артовкст. Сынь явовить вейкест-вейкест эйстэ, улить ильведевкс мартояк, ансяк, кода корты тейтересь, теезь ильведевкстнэнь лангсо сон тонавтни ды бажи седе тов сынст а тейнемс. – Сехте вадря важодевксэкс лован «Спасской соборонть», конань артыя акварельсэ «Красота Божьего мира» пелькстамонтень. 2025 иестэ жо мон невтия ерокчим «Росмолодежь» вейсэндявксонть пельде 2-це сезононь конкурссонть, сермадынь «Арт-пространство «ЭКОМИР» проект, конань лувсо истя жо эрявсь теемс ламо артовкст минек пертьпелькстэнть. Те теварсевксэсь лездась тень седеяк кастомс маштомачинь, важодемась лангсонзо мольсь кувать. Кадовсь овсе аламо шка грантонь выставкантень, сон юты 2026 иень декабрясто. Паро, валсо ды вечкемасо лездасть тень малавиксэнь. Седеяк пек кавто тонавтыцян – Морозова Наталья Владимировна ды Колмакова Елена Владимировна, кавонест эсь тевень профессионалт. Кизэнть Маша ютавтызе лезэвстэ. Аволь умок сон ульнесь Московсо ютавтовиця «Изо и музеи» эйкакшонь культурань раськеютконь 5-це форумсонть. Юлия Будкина тонавтыцянзо марто тонавтнесь од методикатнес ды технологиятнес. Яна Зеткина