Кеченьбуесь – «Чурькань мастор»
Кеченьбуесь – «Чурькань мастор» Неть читнестэ Орданьбуень Кеченьбуе велесь теевкшнесь гастрономической ды культурань покш таркакс. Тесэ келейстэ тешкстызь «Чурькань мастор» эмежень кастомань фестиваленть. Покш чинтень сакшность сыренек-однэк. Кеченьбуесь (рузкс – Кечушево) – содавикс веле, тесэ ламо иень перть эрицятне кастыть чурькат, мейле эйсэст микшнить масторонок келес. Тесэ путыть аволь чурькань пандят... чурькань пиреть! Нама, кенярксчинь прявт героекс кармась чурькась. Выставкасонть невтевсть эрьва кодат ярсамопельть, конатне пидезь-панезь чурькасто. Ды весемесь пек тантей, келетькак нильсак! Ярсамопельтнень вакссо аштесть те енксонь раськень промыслатнеяк. Культурань покш программа анокстась Орданьбуень Культурань кудось. Фестивальсэнть невтезельть чурькасто теезь оршамопельть. Артисттнэ казсть мельстуиця концерт, косо гайгсть тиринь мастордо морот, ульнесть ламо киштемат. Ломантне эзть кирдеве таркасост ды, вечкевикс моротнень марязь, лиснесть киштеме весень марто. Кенярксчисэнть казевсть сеть азораватне, кить зярыя иень перть кастыть сехте ламо чурькат. Вишка ваныцятненень някань театрась невтизе Джанни Родаринь «Чиполлино» путовксонть. Инжетненень теезель мазый фотозона, косо ульнесть чурькасто ды лия эмежстэ кодазь гирляндат. Эрьвась тейнесь вейсэнь фотот покш эмежтнень марто, чурькасто эрьгетнень марто. «Чурькань мастор» фестивалесь кармась алкуксонь кенярксчикс, конась кецявтынзе весе инжетнень, пурнынзе вейс велень эрицятнень. Сон ютавтозель Культурань инициативатнень Президентэнь фондонть лезксэнзэ вельде. Фототне саезь Орданьбуень Культурань кудонь лопасто.