Саранскоесь - Трудовой доблестень ош!
Саранскоесь - Трудовой доблестень ош! Владимир Путин сермадстсь масторонь оштненень «Трудонь доблестень ош» лементь максомадо Указ. 1941-1945 иетнень Ине Отечественной войнасо Изнямонть саемасо эрицятнень путовксост кис «Трудонь доблестень ош» почетонь лемесь максозь Саранскоентень. Мордовиянь прявт оштонть башка те лемесь максозь Россиянь эште 11 ошнень: Березниктненень, Бирскоентень, Вятской Полянатненень, Йошкар-Олантень, Копейскоентень, Королевонтень, Первоуральскоентень, Серовонтень, Уссурийскоентень, Ухтантень, Черемховонтень. Мордовиясь свал аштесь каштанчисэ сетнень кувалма, кить Ине Отечественной войнань иетнестэ важодсть Изнямонь чинть малавгавтомга. Ней тылэнь важодицятнень ине тевест пингеде-пингес ванстови «Трудонь доблестень ош» почетонь лемсэнть, конань Саранскоесь карми кандомо покш каштанчи марто. Тень коря эсь мелест евтыть Саранск ошонь эрицятне. Ольга Дорофеева – Саранск ошонь эриця, «Тавла» образованиянь центрань – 17 № школань эрзянь келень тонавтыця: – Мон аштян покш мельспаросо Саранск ошонтень истямо почетной лементь максоманть кувалма. Масторонть туртов стака шкастонть, Ине Отечественной войнань иетнестэ, Мордовиянь прявт ошось, кода весе масторось, эзь кадово ве енов ды тейсь весементь фронтонть топавтомга. Весе эрицятне, вишкиненек-покшнек, важодсть Изнямонть малавгавтомга. Минек республикасо ды целанек масторсонть арась вейкеяк кудораське, кинь эзизе тока те зыянось. Минек семиясояк улить эсенек героенек. Ине Отечественной войнань толонть пачк ютасть монь покштям Петр Демьянович Калугин ды прапокштям Иван Иванович Кияткин. Арсян, Саранск ошонтень покш лементь максомасо ули сынсткак путовксост. Минь жо – эйкакштне, нуцькатне, правнуцькатне – сынст ине тевест поладыцят, Тиринь масторонь вечкицят!