❗⚡Уледе валдо превсэ, илядо маняво!
❗⚡Уледе валдо превсэ, илядо маняво! Зубова-Полянань районга Россиянь ОМВД-нь сотрудниктне ливтизь лангс телефононь аферисттнэнень лездыцянть, конась саинзе 74 иесэ пенсионерканть 800 тежат целковоень покшолмасо ярмаконзо. Те – Нижней Новгородонь 17 иесэ школьникесь. Зыянс понгозенть валонзо коряс, сонензэ гайгстась а содавикс ломань, конась евтызе прянзо ФСБ-нь сотрудникекс. Церась пачтясь, келя, мошенниктне аванть лемс сайсть вейке миллиононь покшолмасо кредит. Зыянов тевенть кардамга эрявсь кредитэнть пекстамс. Текень пингстэ мерсь, келя, ярмактнень максомат курьерэнтень, конась сы авантень кудов. Аферисттнэнень кемезь, пенсионеркась а содавикс од ломанентень максынзе 400 тежат целковоензэ. Кавто чинь ютазь азарсь ломантне таго сюлмавсть зыянс понгозенть марто. Ды таго кармавтызь курьерэнть вельде кучомс эште 400 тежат целковойть. Зярыя чинь ютазь пенсионеркантень таго гайневтсть, кортнемстэ сынь пачтясть, келя, кредитэсь кодаяк а пекстави, секс эряви эште весть кучомс 400 тежат целковойть. Чить авантень кудов сась секе од ломанесь, конась саинзеяк ярмактнень. Паряк, те тевесь пачкодевель седеяк покш суммас, бути аволизь лоткавто полициянь сотрудниктне, конатне ванкшность оперативной информациянть. Кода вере сермадынек, телефононь аферисттнэнень лездыцякс ульнесь Нижней Новгородонь 17 иесэ од ломанесь. Полициянь сотрудниктненень сон пачтясь, келя, курьерэнь роботанть муизе интернетэнь сетьстэ. Кураторонть марто сюлмавомадо мейле таксисэ ардыль Мордовияв, саилинзе ярмактнень ды сеске туиль мекев кудов. Саезь ярмактнень кучилинзе банкомат вельде, эстензэ кадыль зярыя процентт.