Кастызь содамочист
Кастызь содамочист «ЭтноСМАРТ» – эрьва иень раськеютконь форумось масторонь эрьва кодамо таркасто ветецеде пурнакшнынзе ломантнень. Сентябрянть ушодовомсто Карелия Республикань Петрозаводскойсэ ютась форум, конась алтазель Россиянь раськетнень вейсэндявомань иентень. Форумсонть важодсть 500 ламо ломанть, ютксост общественной организациятнень представительть, од лидерт, активистт, экспертт, СВО-нь участникть. Мордовиясто форумсонть ульнесь О.С. Дорофеева, «ЦО «Тавла» – СОШ № 17 им. З.В. Ермольевой» Саранскоень МОУ-нь эрзянь ды мокшонь кельтнень тонавтыцясь. Форумонтень сыцятненень анокстазель покш программа, конасонть ульнесть профессиональной кортамот, вейсэнь проектэнь анокстамот ды вейке-вейкенень содамочинь, ерокчинь невтемась. Колмо чинь перть Ольга Сергеевна важодсь зярыя площадкава. «Смыслы и ценности» теманть коряс кортасть седе, кода сюлмавить весероссиянь гражданской ды раськень идентичносттне. Кортасть питнейчитнеде, конат лездыть ванстомс общественной вейсэндявоманть. – «Профилактика социально-негативных явлений» площадканть лувсо минь ваннынек алкуксонь кейстнэнь ды практической тевтнень. Карминек содамо информационной рисктнеде ды сынст кардамонь китнеде-янтнэде. Кортнинек од ломантнень ютксо берянь тевтнень анолдамодонть. Теевинек содавиксэкс ресурстнэнь ды инструменттнэнь марто, конатнень мереви нолдамс тевс общественной организациятненень, – тешкстась Ольга Сергеевна. – Форумось кармась аволь ансяк талновтыця кевкстематнень толковамонть туртов таркакс, истя жо сон лезды пурназь содамочитнень ды мельтнень-бажамотнень совавтомс эрямос проекттнэсэ. Яна ЗЕТКИНА