Лездыть минек цёратненень
Лездыть минек цёратненень Минек республикань Тейтерьавань вейсэндявксось ды Мордовиянь Отечествань воинтнэнь семиянь комитетэсь вейсэ Народной фронтонть марто секе-тев ильтить гуманитарной сталмот СВО-нь таркатнесэ цератнень туртов. Те тевентень покш мель явить республикань районтнэсэ эрицятне. Сынь аволь ансяк ярмакт пурныть, эште эсест садпиретнесэ кастозенть: модамарть, чурькат, капстат ды лия эмежть, – ильтить минек цератненень. Кодыть носкат, варьгат ды лия оршамопельть. Невтемакс, Покш Березникень муниципальной райононь Сыре ломанень центрань аватне аволь умок кодасть кекшемань 12 алтымат. Те тевенть истя жо топавтыть те райононь лия велетнесэ эрицятнеяк. Ламот бажить куш аламодо шождалгавтомс минек цератнень эрямост, кить неень шкане ванстыть сэтьме эрямонок. Кода мерсь Мордовия Республикань Тейтерьавань вейсэндявксонь прявтось Ольга Игнатова, республикань весе районтнэсэ улиця сынст организациянь прявттнэ вейсэндить перькаст тевень вечкиця, седеймариця ломантнень. Малав комсьветее иень перть Ицялонь райононь Тейтерьавань вейсэндявксонть прявтсо Мордовия Республикань образованиянь заслуженной роботникесь, трудонь ветеранось Татьяна Зеленеева. Сон малав ниленьгемень иеть ульнесь тонавтыцякс Кемлянь аграрной колледжсэ ды нейгак а ашти ве ено общественной тевтнеде. Весе виензэ ды содамочинзэ максы тейтерьавань вейсэндявксонтень. Сон свал эрси Ицялонь районсо ютавтовиця малав весе мероприятиятнесэ. Нама, сехте покш мель яви специальной военной операциянь участниктненень ды сынст семиятненень лезксэнь максомань тевтнесэ.