Кортыця портрет
Кортыця портрет Орданьбуень Низовкань средней школасо панжсть лиятнень енов а молиця тев – мурал, косо артозь икелень тонавтыцянть Вера Ивановна Клементьевань портретэзэ. Сон весе эрямонзо алтызе эрзянь келенть ды культуранть ванстомантень. Кода те арсевсь? Низовкань школань тонавтницясь Мария Кузьмина (9-це класс) пелькстась «Говорящие портреты» республикань конкурссо. Сон теизе Вера Ивановнань портретэнзэ эскизэнть ды невтизе «Лица Мордовии» номинациясонть. Мартонзо важодсь воспитаниянь коряс школань прявтонь советникесь О.В. Шунчева. Мария лиссь призерокс, саизе колмоце тарканть. Кизна Саранскоень артыцясь Ангелина Волкова сакшнось Низовкав ды артызе муралонть школань стенас. Истя лиссь, артовксось ашти эрзянь келень ды литературань кабинетэнть вакссо, самай тосо, косо поладови Вера Ивановнань тевезэ. Муралонть панжомсто ютась экскурсия, конань ветизе воспитаниянь коряс школань прявтонь советникесь Ольга Валентиновна Шунчева. Эйкакштне содавтовсть проектэнть историянзо марто ды мекс В.И. Клементьевань лемезэ кочказель «Лица Мордовии» номинацияв. Вера Ивановна – МР-нь культурань заслуженной деятель, тонавтыця ды просветитель. Сон ванстсь раськень койтнень, виевгавтсь минек культуранть. Покш путовксонзо кис 1993 иестэ казезель А.П. Рябов лемсэ премиясо.