⚡⚡Уледе валдо превсэ, илинк максо прянк манямс!
⚡⚡Уледе валдо превсэ, илинк максо прянк манямс! Саранск ошка Россиянь УМВД-нь 1 № ОПв пшкадсть Покш Елховкань эрицятне, конатне пачтясть сынст ярмакост манямодо. 52 иесэ зыянс понгозь аванть валонзо коряс, сонензэ сась пачтямо домовой чатс совавтомадонзо. Тень туртов эрявсь сермадомс пачтямостонть сазь кодонть. Теде мейле таго тензэ сермадсть Госуслугасо личной кабинетэнзэ яжамодо ды макссть телефононь номер. Тандадоманть пачк авась гайневтсь васня мирденстэнь, конась те шкастонть важодема таркасоль, ды тердизе кудов. Мейле гайневтсь кучозь номерганть. Асодавиксэнть марто кортнемстэ, конась евтызе прянзо персональной данноень ванстоманть коряс специалистэкс, мирдть-нить кармасть содамо, келя, аванть пельде сермадозь кредитэнь саемга доверенность церанть лангс, конань вешнить террористтнэнень лездамонть кис. Теде мейле мошенниктне пачтясть, келя, шкань апак таргсе авантень саемат ванстовиця ярмаконзо ды путомат кучозь QR-кодонть коряс од счетс. Сень лангс апак вано, зыянс понгозь аванть банксо ярмаконзо арасельть, ялатеке кемезевсть аферисттнэнень ды кучизь мирдензэ счетсо ванстовиця 1 миллион 200 тежат целковойтнень. Омбоце чистэ зыянонь теицятне таго сюлмавсть аванть марто ды пачтясть, келя, лангозонзо кить-бути сайсть кредит, тень кувалма шкань апак таргсе эряви кредитэнть пекстамс. Тандадоманть пачк мирдезэ эсь тетянзо кедьстэ вешсь 500 тежадо ламо целковойть, конатнень истя жо сынь кучизь асодавикстнэнень. Ярмактнень кучомадо мейле мошенниктне таго гайневтсть ды толковасть тенст, келя, финансовой операциянть эште весть теема. Тесэ уш мирденть-нинть превест валдомгадсть, сынь чарькодсть манямонтень. Сеске пшкадсть полицияв. Мордовия Республикава МВД-сь тагояк ледсти: – Бути тенк гайневтсть ды пачтясть счетонк марто а содавикс операциятнеде, безопасной счетс ярмаконк ютавтомадо, сеске лоткавтынк кортамонть, гайневтеде банков, косо ванстовить ярмаконк. Уледе валдо превсэ, илядо кучне ярмаконк асодавикстнэнень. Кодаткак «безопасной счетт» арасть.