Резеповтнень кудораськесь «Семейной зарницань» финалсо
Резеповтнень кудораськесь «Семейной зарницань» финалсо Волгоградсо поладовить «Семейная зарница» весероссиянь военно-патриотической налксемань пелькстамотне. Мордовиянть пельде тосо Резеповтнень семиясь ды сынст наставникест – СВО-нь ветеранось Валентин Адрахманов. Валентин тусь фронтов доброволецэкс 2025 иестэ. Служась ледницякс-пулеметчикекс, ульнесь Донецкой направлениясо боевой подготовкань коряс инструкторокс. Декабрясто стакасто ранязель – чалгавсь взрывной устройствас, кадовсь керш пильгевтеме. Казезь Мужествань орденсэ. Мероприятиянть панжомадонзо мейле пелькстыцятнень сайнизь ошканть-геройганть экскурсияв. Финалисттнэ ванкшнызь Россиянь военной прявт мемориалонть – Мамаев курганонть. Воинской славань залсонть семиятне чатьмонемань минутасо ледстизь войнасо чавовозтнень валдо лемест, путсть цецят Свал палыця толонтень. «Семейная зарница» военно-патриотической налксемань прявт пельксэкс кармась «Маршрутной квест-налксемась». Командатне ютасть эрьва кодамо енксонь коряс 10 контрольной точкат: кода максомс медицинань васенце лезкс, кода ветямс БПЛА-нть, ладямс радиосвязенть... Эрьва этаптонть мейле участниктне топавтсть интеллектуальной задачат. Те ульнесь аволь шожда. Семиятнень туртов эште вейке вешемакс кармась кудораськень чувтонь теемась – эсь ундокстнэнь содамось, семиянь койтнень ванстомась. Те кармась программань эрявикс пельксэкс ды тагояк невтизе весенень, семиясь – эрямосонть кеме неже. Лия пелькстамотнесэ участниктне невтсть эсь кедьсэ теезь танконь макетт. Истя жо эрявсь пидемс-панемс тантей ярсамопель, сень, конань сеедьстэ анокстыть кудосо-семиясо. Резеповтне парсте невтить пряст «Семейной зарницань» весероссиянь финалсо. Арсетяно тенст изнямо! Фотось «Защитники Отечества» Госфондонть.