Кода ванстомс од ломантнень зыянов тевтнеде
Кода ванстомс од ломантнень зыянов тевтнеде А. С. Пушкин лемсэ Национальной библиотекасо ютась «ПЕДСОВЕТ. 3-е СЕНТЯБРЯ» весероссиянь научно-практической кругловой столь. Сон мольсь омбоцеде ды пурнась экспертт Россиянь кавксо регионтнэстэ, истя жо Белоруссиясто ды Испаниясто. Вейсэнь кортамось мольсь седе, кода ванстомс од ломантнень диверсионно-террористической тевтнеде. Те промксонть ютавтыцякс кармасть минек региононь Антитеррористической комиссиясь ды МР-ва Россиянь УФСБ-сь. Прявт темакс кармась «#НеТотЗаработок: как вербуют в Интернете» ды «Школа Твоей Антитеррористической Безопасности #ШТАБ» проектэсь. Вастовоманть панжизе МР-нь Прявтонь Администрациянь ды Правительствань Антитеррористической комиссиянь тевтнень коряс отделэнь прявтось Сергей Шамин. Сон пачтясь, терроризмань профилактикасонть эряви аволь ансяк ведомстватнень ютксо важодема, истя жо лезэнь кандыця мероприятият: илязт понго ломантне, седеяк пек одтнэ, диверсионно-террористической тевтнес. Вадря мельть тень коряс евтась МР-ва Антитеррористической комиссиянь аппаратонь важодицясь Светлана Юдина. Паро вал марто пурнавозтненень пшкадсть МР-нь Од ломанень тевтнень коряс Госкомитетэнь прявтось Анастасия Гришнева, зыянонь а нолдамонь правовой аспекттнэде кортасть МР-нь юстициянь министрань васенце полавтыцясь Артем Лукьянов ды МР-ва РФ-нь Минюстонь Управлениянь прявтонь полавтыцясь Владимир Клюев. Духовно-нравственной воспитаниядо кортасть протоиереесь Павел Горбунов ды иереесь Василий Матвеев. Од ломантнень марто эряви кортнемс чамадо чамас, сельмеде сельмес. Кругловой стольсэнть важодсть истя жо психологт ды педагогт. Сынь евтнесть, кода бороцямс вербовканть марто соцсеттнесэ, кода лездамс студенттнэнень чарькодемс антитеррористической енкстнэнь. Башка мель явозель медиаграмотностентень. СВО-нь волонтертнэ евтнесть волонтеронь движениятнеде, косо од ломантне лездыть фронтонтень, ды те весе – патриотической алкуксонь воспитания. Вастовоманть прядовомсто пурнавозтне кемекстасть резолюция, эряви совавтомс эрямос деструктивной прянь ветямонь редямонь вейкине стандартт, седе сеедьстэ тевс нолдамс налксемань форматт ды тонавтомс школань тонавтницятнень информациянь ванкшномань методикатнес.